Pwoveb 7 | HCB Bible Study

Pwoveb 7:1 (HCB)
Pitit mwen, chonje sa m'ap moutre ou la a. Pa janm bliye sa m'ap di ou pou fè a.

Pwoveb 7:2 (HCB)
Si ou fè sa m'ap di ou pou fè a, w'a viv. Konsidere sa m' moutre ou la tankou de grenn je nan tèt ou.

Pwoveb 7:3 (HCB)
Mete li nan tout dwèt ou tankou bag, kenbe li nan kè ou pou ou pa janm bliye l'.

Pwoveb 7:4 (HCB)
Konsidere konesans tankou sè ou. Konsidere bon konprann tankou pi bon zanmi ou.

Pwoveb 7:5 (HCB)
Y'ap fè ou rete lwen madanm lòt moun. Yo p'ap kite ou pran nan pawòl dous madan marye ki nan dezòd.

Pwoveb 7:6 (HCB)
Yon jou, antan mwen nan fennèt lakay mwen, mwen t'ap gade nan fant jalouzi a.

Pwoveb 7:7 (HCB)
Mwen wè anpil jenn gason san esperyans nan lavi. Te gen yonn ladan yo menm ki te fin fou.

Pwoveb 7:8 (HCB)
Li t'ap mache nan lari a, li rive bò kay yon fanm. Konsa, konsa, li pran chemen ki mennen kay fanm lan.

Pwoveb 7:9 (HCB)
Le sa a solèy te kouche, te fin fè nwa.

Pwoveb 7:10 (HCB)
Madanm lan menm vin kontre li. Li te abiye tankou yon jennès, ak tout plan l' dèyè tèt li.

Pwoveb 7:11 (HCB)
Fanm lan te gen je chèch, li pa t' wont anyen. Li pa t' kapab rete chita lakay li.

Pwoveb 7:12 (HCB)
Li toupatou nan lari, sou laplas, nan tout kalfou. L'ap veye, je l' toupatou.

Pwoveb 7:13 (HCB)
Li pase bra l' nan kou ti jennonm lan. Li bo li, li klere je l' nan je l', li di l':

Pwoveb 7:14 (HCB)
Mwen te gen pou m' ofri yon bèt pou yo touye pou di Bondye mèsi. Se jòdi a mwen kit ak angajman mwen an.

Pwoveb 7:15 (HCB)
Se poutèt sa, mwen vin kontre ou. Mwen t'ap chache ou, mwen jwenn ou.

Pwoveb 7:16 (HCB)
Mwen ranje kabann mwen ak bon jan dra. Mwen mete bèl dra koulè ki soti peyi Lejip sou kabann mwen.

Pwoveb 7:17 (HCB)
Mwen fè kabann mwen santi bon. Mwen vide odè flè jasmen, womaren ak kannèl sou li.

Pwoveb 7:18 (HCB)
Vini non! Ann al damou jouk li jou. Annou pran plezi nou. Ann fè doudous jouk nou sou.

Pwoveb 7:19 (HCB)
Mari m' pa la, li pati, li al fè yon vwayaj byen lwen.

Pwoveb 7:20 (HCB)
Li pati ak anpil lajan nan pòch li. Li p'ap tounen anvan kenz jou.

Pwoveb 7:21 (HCB)
Se konsa, fanm lan fin pran tèt ti jennonm lan. Ak bèl pawòl dous li yo, li fè l' asepte.

Pwoveb 7:22 (HCB)
Jennonm lan pran swiv li, tankou bèf y'ap mennen labatwa, tankou kabrit yo pran nan pèlen

Pwoveb 7:23 (HCB)
k'ap tann yo vin koupe tèt li, tankou zwazo k'ap mache sou pèlen san li pa konnen lavi l' an danje.

Pwoveb 7:24 (HCB)
Koulye a, pitit mwen yo, koute byen. Louvri zòrèy nou, tande sa m'ap di nou.

Pwoveb 7:25 (HCB)
Pa kite kè nou bat pou fanm konsa. Pa kite li fè nou pèdi chemen nou.

Pwoveb 7:26 (HCB)
Li lakòz anpil gason tonbe mouri. Li lakòz anpil vanyan gason pèdi lavi yo.

Pwoveb 7:27 (HCB)
Depi ou mete pye lakay li, ou sou chemen lanmò. W'ap desann yon pant k'ap mennen ou tou dwat nan simityè.

Previous Chapter
« Pwoveb 6

Next Chapter
Pwoveb 8 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31