Pwoveb 16 | HCB Bible Study

« Pwoveb 15

Pwoveb 17 »

Pwoveb 16:1 (HCB)
Lèzòm fè lide nan kè yo. Men, dènye mo a nan men Bondye.

Pwoveb 16:2 (HCB)
Lèzòm mete nan lide yo tou sa yo fè bon. Men, pa bliye se Bondye k'ap jije sa ki nan kè yo.

Pwoveb 16:3 (HCB)
Mande Seyè a pou l' beni tout travay w'ap fè, w'ap reyisi nan tou sa w'ap fè.

Pwoveb 16:4 (HCB)
Tou sa Seyè a fè, li gen yon rezon ki fè l' fè li. Menm mechan an, li kreye l' pou l' ka pini l'.

Pwoveb 16:5 (HCB)
Seyè a pa ka sipòte moun k'ap gonfle lestonmak yo sou moun. Wè pa wè, l'ap fè yo peye sa.

Pwoveb 16:6 (HCB)
Si ou pa janm vire do bay Bondye, si ou toujou kenbe pawòl ou, Bondye va padonnen peche ou yo. Lè yon moun gen krentif pou Bondye, l'ap evite fè sa ki mal.

Pwoveb 16:7 (HCB)
Lè yon moun ap viv yon jan ki fè Seyè a plezi, Seyè a ap fè ata lènmi l' yo aji byen avè l'.

Pwoveb 16:8 (HCB)
Pito ou fè ti pwofi nan fè sa ki dwat pase pou ou fè gwo benefis nan fè sa ki mal.

Pwoveb 16:9 (HCB)
Lèzòm fè plan travay yo nan kè yo. Men, se Seyè a k'ap dirije sa y'ap fè a.

Pwoveb 16:10 (HCB)
Lè yon wa pale, se tankou si se te Bondye ki pale. Lè l'ap jije, li p'ap janm rann move jijman.

Pwoveb 16:11 (HCB)
Seyè a mande pou yo sèvi ak bon balans pou peze. Li pa vle pou yo sèvi ak move mezi nan kòmès.

Pwoveb 16:12 (HCB)
Wa yo pa ka sipòte lè moun ap fè mechanste, paske tout fòs yon gouvènman se lè li defann dwa tout moun.

Pwoveb 16:13 (HCB)
Wa a kontan ak tout moun ki di verite. Li renmen moun ki pa nan bay manti.

Pwoveb 16:14 (HCB)
Lè wa a move, atansyon, moun ka mouri! Moun ki gen bon konprann ap toujou chache fè kè wa a kontan.

Pwoveb 16:15 (HCB)
Lè wa a kontan, se lavi pou tout moun. Lè li bay yon moun favè l', se tankou yon nwaj ki pote yon bon lapli prentan.

Pwoveb 16:16 (HCB)
Pito ou gen bon konprann pase pou ou gen byen. Pito ou gen konesans pase ou gen lajan.

Pwoveb 16:17 (HCB)
Moun ki mache dwat fè chemen yo yon jan pou yo pa fè sa ki mal. Gade kote w'ap mete pye ou pou ou pa mouri mal.

Pwoveb 16:18 (HCB)
Lè ou gen lanbisyon, yo pa lwen kraze ou. Lè w'ap fè awogans, ou pa lwen mouri.

Pwoveb 16:19 (HCB)
Pito ou mennen ti vi ak pòv malere yo pase pou ou nan separe ak awogan yo nan sa yo vòlò.

Pwoveb 16:20 (HCB)
Moun k'ap repase nan tèt li tou sa yo moutre l' va wè zafè l' mache byen. Ala bon sa bon pou moun ki mete konfyans yo nan Seyè a!

Pwoveb 16:21 (HCB)
Lè yon moun gen bon konprann, yo di li gen lespri. Lè ou pale byen sa fè ou gen plis konesans.

Pwoveb 16:22 (HCB)
Moun ki gen bon konprann gen lavi. Men, moun sòt ap toujou sòt.

Pwoveb 16:23 (HCB)
Yon moun ki gen bon konprann kalkile anvan li pale. Konsa pawòl li vin gen plis pèz.

Pwoveb 16:24 (HCB)
Bon pawòl se siwo myèl. Yo bon pou sante ou, yo dous pou nanm ou.

Pwoveb 16:25 (HCB)
Chemen ou kwè ki bon an, se li ki mennen ou tou dwat nan lanmò.

Pwoveb 16:26 (HCB)
Grangou fè ou travay rèd, paske ou bezwen manje pou ou mete nan bouch.

Pwoveb 16:27 (HCB)
Mechan an toujou ap chache jan pou li fè moun mal. Ata pawòl nan bouch li boule tankou dife.

Pwoveb 16:28 (HCB)
Ipokrit toujou ap pouse dife. Moun k'ap fè tripotay mete zanmi dozado.

Pwoveb 16:29 (HCB)
Mechan an pran tèt kanmarad li, li fè l' fè sa ki pa bon.

Pwoveb 16:30 (HCB)
Moun k'ap twenzi je yo sou moun, se moun ki gen move lide dèyè tèt yo. Moun k'ap fè siy sou moun, se moun ki sou move kou.

Pwoveb 16:31 (HCB)
Cheve blan se bèl rekonpans. Moun ki mache dwat va viv lontan.

Pwoveb 16:32 (HCB)
Pito ou aji ak pasyans pase pou ou fè fòs sou moun. Pito ou konn kontwole tèt ou pase pou ou gwo chèf lame k'ap mache pran lavil.

Pwoveb 16:33 (HCB)
Moun tire kat pou yo konnen sa pou yo fè. Men, desizyon an se nan men Bondye li ye.

Previous Chapter
« Pwoveb 15

Next Chapter
Pwoveb 17 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters