Pwoveb 19 | HCB Bible Study

Pwoveb 19:1 (HCB)
Pito ou pòv men ou se nèg serye pase pou w'ap bay manti epi pou ou sòt met sou li.

Pwoveb 19:2 (HCB)
Sa pa bon pou ou prese fè anyen san ou pa konprann sa w'ap fè. Si ou pa gen pasyans, ou ka nan pwoblèm.

Pwoveb 19:3 (HCB)
Se sotiz yon nonm ki fini avè l'. Apre sa, li konprann pou l' fache sou Bondye.

Pwoveb 19:4 (HCB)
Lè ou gen lajan, ou toujou gen zanmi. Men lè ou pòv, dènye zanmi vire do ba ou.

Pwoveb 19:5 (HCB)
Lè yon moun ap sèvi temwen nan tribinal, si li fè manti, yo gen pou yo pini l'. Pa gen rechap pou moun k'ap bay manti.

Pwoveb 19:6 (HCB)
Anpil moun ap achte figi grannèg. Tout moun vle zanmi moun k'ap bay favè.

Pwoveb 19:7 (HCB)
Lè ou pòv, ata frè ou pa vle wè ou. Ou pa bezwen mande si zanmi p'ap lage ou! Tout chache w'ap chache pale ak yo, yo pa okipe ou!

Pwoveb 19:8 (HCB)
Si ou renmen tèt ou, chache gen konprann. Pa bliye sa ou te aprann, zafè ou va mache byen.

Pwoveb 19:9 (HCB)
Lè yon moun ap sèvi temwen nan tribinal, si li fè manti, yo gen pou yo pini l'. Moun k'ap bay manti gen pou mouri.

Pwoveb 19:10 (HCB)
Yon moun ki san konprann pa fèt pou gen tout bagay, ni yon esklav pa fèt pou chèf sou grannèg.

Pwoveb 19:11 (HCB)
Yon moun ki gen bon konprann pa fè kòlè fasil. Tout kalite li, se pa okipe moun ki fè mal.

Pwoveb 19:12 (HCB)
Lè yon wa ankòlè, se tankou yon lyon k'ap gwonde. Men, favè yon chèf se tankou lapli sou jaden.

Pwoveb 19:13 (HCB)
Yon pitit ki san konprann se yon malè pou papa l'. Yon fanm ki toujou ap chache kont, se yon goutyè k'ap degoute dlo san rete.

Pwoveb 19:14 (HCB)
Kay ak lajan, se byen manman ak papa ka mouri kite pou ou. Men, yon fanm ki gen konprann, se Seyè a ase ki ka fè ou jwenn sa.

Pwoveb 19:15 (HCB)
Parès fè je ou toujou lou. Moun ki rete san fè anyen ap rete grangou.

Pwoveb 19:16 (HCB)
Moun ki fè sa Bondye mande ap viv lontan. Moun ki pa mache jan Bondye vle l' l'a pa lwen mouri.

Pwoveb 19:17 (HCB)
Lè ou bay pòv lacharite, se Bondye ou prete. Se li menm ki va renmèt ou sa.

Pwoveb 19:18 (HCB)
Korije pitit ou yo lè yo piti toujou. Men, pa bat yo jouk ou touye yo.

Pwoveb 19:19 (HCB)
Moun ki gen san wo ap peye konsekans zak li yo. Si ou wete l' nan move pa a yon fwa, w'ap blije fè l' pou li tout tan.

Pwoveb 19:20 (HCB)
Koute konsèy y'ap ba ou. Louvri zòrèy ou pou aprann. Konsa w'a gen bon konprann jouk ou mouri.

Pwoveb 19:21 (HCB)
Yon moun te mèt fè tout kalite lide nan tèt li. Men, sa Seyè a vle a, se sa ki pou rive.

Pwoveb 19:22 (HCB)
Tou sa yo mande yon moun se pou l' gen bon kè. Pito yon moun pòv pase l' mantò.

Pwoveb 19:23 (HCB)
Gen krentif pou Bondye, w'a jwenn lavi, w'ap toujou kontan. Malè p'ap rive ou.

Pwoveb 19:24 (HCB)
Gen moun ki sitèlman parese ata manje yo pa vle mete nan bouch yo.

Pwoveb 19:25 (HCB)
Pase awogan yo yon je baton, moun san konprann yo va konprann. Rale zòrèy moun ki gen konprann yo, y'a vin gen plis konesans.

Pwoveb 19:26 (HCB)
Se yon wont, se yon dezonè pou yon pitit aji mal ak papa l', osinon pou l' mete manman l' deyò lakay li.

Pwoveb 19:27 (HCB)
Pitit mwen, lè ou sispann aprann, ou pa lwen bliye sa ou konnen deja.

Pwoveb 19:28 (HCB)
Yon temwen k'ap bay manti pase lajistis nan betiz. Mechan yo pran plezi nan fè mechanste.

Pwoveb 19:29 (HCB)
Baton an tou la pou moun k'ap pase moun nan betiz. Fwèt la tou pare pou dèyè moun ki san konprann.

Previous Chapter
« Pwoveb 18

Next Chapter
Pwoveb 20 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters