Pwoveb 27 | HCB Bible Study

Pwoveb 27:1 (HCB)
Pa fè grandizè pou sa ou pral fè denmen. Ou wè jòdi, ou pa konn denmen.

Pwoveb 27:2 (HCB)
Kite lòt moun pale byen pou ou. Pa fè sa ou menm. Kite etranje fè lwanj pou ou. Pa janm fè lwanj tèt pa ou.

Pwoveb 27:3 (HCB)
Wòch lou, sab lou. Men, yo pa ka pi lou pase yon moun san konprann lè l' fache.

Pwoveb 27:4 (HCB)
Lè yon moun ankòlè, li kraze brize. Men, ki moun ki ka kenbe tèt ak yon moun k'ap fè jalouzi?

Pwoveb 27:5 (HCB)
Pito ou rale zòrèy yon moun kareman pase pou ou kite l' konprann sa li fè a pa anyen.

Pwoveb 27:6 (HCB)
Lè yon zanmi ap rale zòrèy ou, se byen ou li vle wè. Men, lè yon lènmi ap pase men l' nan kou ou, se twonpe l'ap twonpe ou.

Pwoveb 27:7 (HCB)
Lè vant moun plen, yo refize ata siwo myèl. Lè moun grangou vre, menm bagay anmè gou nan bouch.

Pwoveb 27:8 (HCB)
Yon moun ki lwen lakay li, se tankou yon zwezo ki byen lwen nich li.

Pwoveb 27:9 (HCB)
Losyon ak lwil santi bon bay kè kontan. Konsèy yon bon zanmi remoute kouraj.

Pwoveb 27:10 (HCB)
Pa janm bliye zanmi ou, ni zanmi papa ou. Lè zafè ou pa bon, pa al lakay frè ou. Yon bon vwazen pi bon pase yon frè ki lwen.

Pwoveb 27:11 (HCB)
Pitit mwen, aprann gen bon konprann. Fè kè m' kontan. Konsa, m'a ka reponn moun k'ap kritike m' yo.

Pwoveb 27:12 (HCB)
Moun ki gen konprann, lè li wè malè ap vin sou li, li wete kò l'. Moun sòt pote lestonmak li bay, epi se li ki peye sa.

Pwoveb 27:13 (HCB)
Si yon moun sòt jouk pou li asepte bay pawòl li pou dèt yon etranje, se pou yo sezi ata rad ki sou li jouk lòt la peye.

Pwoveb 27:14 (HCB)
Si ou di yon zanmi ou bonjou twò fò granmaten, se tankou si ou te ba li madichon.

Pwoveb 27:15 (HCB)
Yon fanm ki toujou ap chache kont, se tankou yon goutyè k'ap degoute lè lapli ap tonbe tout lajounen.

Pwoveb 27:16 (HCB)
Si ou rive fè l' pe bouch li, w'a kenbe van ak men ou, w'a kenbe lwil ak dwèt ou tou!

Pwoveb 27:17 (HCB)
Menm jan fè file fè, konsa tou pou moun, yonn aprann nan men lòt.

Pwoveb 27:18 (HCB)
Moun ki pran swen yon pye rezen, se li ki va jwenn rezen pou li manje. Moun ki fè travay mèt li byen, y'a gen respè pou li.

Pwoveb 27:19 (HCB)
Lè ou gade nan glas, se pwòp figi ou ou wè ladan l'. Konsa tou, lè ou gade nan kè yon moun, ou wè ki moun li ye.

Pwoveb 27:20 (HCB)
Menm jan toujou gen plas pou mò kote mò yo ye a, konsa tou, toujou gen plas pou lanvi nan kè moun.

Pwoveb 27:21 (HCB)
Yo pase lò ak ajan nan dife pou wè si yo bon. Konsa tou, dapre jan yo nonmen non yon moun, yo ka di ki moun li ye.

Pwoveb 27:22 (HCB)
Ou te mèt woule yon moun sòt anba baton tankou yo bat pwa, se pa sa k'ap fè l' kite sòt.

Pwoveb 27:23 (HCB)
Chache konnen jan tout bèt ou yo ye. Pran swen yo.

Pwoveb 27:24 (HCB)
Richès pa la pou tout tan. Ou ka pa rive pase tout byen ou bay pitit pitit ou.

Pwoveb 27:25 (HCB)
Lè ou koupe zèb, li pouse ankò. Konsa, toujou gen zèb sou mòn yo.

Pwoveb 27:26 (HCB)
Mouton ou yo ap ba ou lenn pou fè rad met sou ou. Bouk kabrit yo ap rapòte ou lajan pou achte tè pou fè jaden.

Pwoveb 27:27 (HCB)
W'a jwenn kont lèt kabrit pou ou bwè ak fanmi ou ansanm ak moun k'ap sèvi lakay ou.

Previous Chapter
« Pwoveb 26

Next Chapter
Pwoveb 28 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31