Pwoveb 17 | HCB Bible Study

Pwoveb 17:1 (HCB)
Pito ou manje yon grenn bannann chèch ak kè poze pase pou ou fè gwo fèt nan mitan dezagreman.

Pwoveb 17:2 (HCB)
Yon esklav ki gen konprann va chèf sou yon pitit ki fè papa l' wont. L'a jwenn pa l' nan eritaj papa a tankou tout pitit.

Pwoveb 17:3 (HCB)
Se dife sèl ki ka fè ou konnen si lò osinon ajan ou genyen an se bon kalite. Konsa tou, se Seyè a sèl ki konnen sa ki nan kè moun.

Pwoveb 17:4 (HCB)
Mechan yo toujou prèt pou koute moun k'ap di move pawòl. Zòrèy mantò yo toujou louvri pou koute moun k'ap bay manti.

Pwoveb 17:5 (HCB)
Lè w'ap pase yon pòv malere nan betiz, se Bondye ki fè l' la w'ap derespekte. Moun ki kontan lè malè rive yon lòt, Bondye ap pini l'.

Pwoveb 17:6 (HCB)
Pitit pitit se rekonpans granmoun. Manman ak papa se kontantman pitit.

Pwoveb 17:7 (HCB)
Yon moun sòt pa ka di anyen ki bon. Konsa tou, yon moun serye pa nan bay manti.

Pwoveb 17:8 (HCB)
Moun ki sèvi ak lajan pou pran tèt moun konprann lajan se wanga. Yo kwè se pou yo reyisi nan tou sa y'ap fè.

Pwoveb 17:9 (HCB)
Si ou vle moun renmen ou, padonnen lè yo fè ou mal. Si w'ap mache repete bagay moun fè ki mal, w'ap mete zanmi dozado.

Pwoveb 17:10 (HCB)
Lè ou fè yon moun ki gen konprann repwòch, sa touche kè l'. Men, ata san kout baton p'ap chanje yon moun sòt.

Pwoveb 17:11 (HCB)
Mechan toujou ap fè rebelyon, men y'a voye yon sanmanman regle avè l'.

Pwoveb 17:12 (HCB)
Pito ou kontre ak yon manman lous k'ap chache pitit li pase pou ou tonbe sou yon moun fou foli moute.

Pwoveb 17:13 (HCB)
Si ou aji mal avèk moun ki fè ou byen, malè ap toujou rive lakay ou.

Pwoveb 17:14 (HCB)
Lè yon kont pete, se tankou dlo ki kase dig kannal. Anvan batay mete pye, chape kò ou.

Pwoveb 17:15 (HCB)
Se de kalite moun Seyè a pa ka sipòte: moun k'ap kondannen inonsan ak moun k'ap pran pou mechan yo.

Pwoveb 17:16 (HCB)
Yon moun sòt te mèt gen kont lajan nan men l', li p'ap janm ka gen konesans. Li pa gen konprann.

Pwoveb 17:17 (HCB)
Yon bon zanmi p'ap janm trayi. Jou malè l'ap tankou yon frè pou ou.

Pwoveb 17:18 (HCB)
Fòk yon moun pèdi tèt li nèt pou l' garanti dèt yon lòt moun.

Pwoveb 17:19 (HCB)
Moun ki renmen chache kont renmen fè sa ki mal. Moun k'ap pale avèk awogans, se moun k'ap mache ak sèkèy yo anba bra yo.

Pwoveb 17:20 (HCB)
Yon moun ki pa gen bon lide nan tèt li p'ap janm gen kè kontan. Moun ki gen move lang ap toujou nan traka.

Pwoveb 17:21 (HCB)
Se lapenn pou yon papa ki fè yon pitit ki san konprann. Papa yon pitit sòt p'ap janm gen kè kontan.

Pwoveb 17:22 (HCB)
Kè kontan bay lasante. Men, lè ou kagou, w'ap deperi sou pye.

Pwoveb 17:23 (HCB)
Malveyan pran lajan nan men moun pou enpoze jistis fèt.

Pwoveb 17:24 (HCB)
Yon moun ki gen bon konprann toujou ap chache konesans. Men, moun sòt pa konn sa li vle.

Pwoveb 17:25 (HCB)
Yon timoun ki san konprann, se chagren pou papa l', se gwo lapenn pou manman l' ki fè l'.

Pwoveb 17:26 (HCB)
Se pa jistis pou inonsan peye pou koupab. Pa gen jistis lè yo bat moun ki pa fè mal.

Pwoveb 17:27 (HCB)
Moun ki gen konesans pa nan pale anpil. Moun ki rete dousman se moun ki gen konprann.

Pwoveb 17:28 (HCB)
Moun ki gen lespri pa janm cho pou pale. Men moun sòt, lè yo rete ak bouch yo fèmen, yo pase pou moun ki gen konprann.

Previous Chapter
« Pwoveb 16

Next Chapter
Pwoveb 18 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters