Pwoveb 20 | HCB Bible Study

Pwoveb 20:1 (HCB)
Twòp bweson fè ou pase moun nan betiz. Twòp gwòg fè ou pete kabouyay, fè lòbèy. Lè ou sou, ou aji tankou moun fou.

Pwoveb 20:2 (HCB)
Lè yon wa ankòlè, se tankou yon lyon k'ap gwonde. Moun ki mete l' ankòlè a, se pwòp tèt li l'ap fè mal.

Pwoveb 20:3 (HCB)
Se bèl bagay lè yon moun evite diskisyon. Moun san konprann toujou ap chache kont.

Pwoveb 20:4 (HCB)
Parese pa pare tè li lè pou l' te pare l', li di fè twò frèt. Lè rekòt rive, li pa jwenn anyen nan jaden l'.

Pwoveb 20:5 (HCB)
Lide yon nonm gen nan tèt li, se tankou dlo nan yon pi byen fon. Men, yon moun lespri ka rale yo mete deyò.

Pwoveb 20:6 (HCB)
Anpil moun ap mache di jan yo se moun serye. Men, ou pa fasil jwenn yon moun ou ka fè konfyans.

Pwoveb 20:7 (HCB)
Lè yon papa se moun serye, li fè sa ki dwat. Sa bon nèt pou pitit li yo.

Pwoveb 20:8 (HCB)
Lè yon wa chita sou fòtèy li, l'ap rann jistis, li wè sa ki mal ak sa ki byen.

Pwoveb 20:9 (HCB)
Ki moun ki ka di: mwen lave konsyans mwen, mwen wete tout peche ki te sou li?

Pwoveb 20:10 (HCB)
Seyè a pa ka sipòte moun k'ap sèvi ak de pwa de mezi.

Pwoveb 20:11 (HCB)
Yon timoun moutre ou sa l'ap soti nan sa l'ap fè. Ou ka di si l'ap serye, si l'ap bon.

Pwoveb 20:12 (HCB)
Se Seyè a ki ban nou je pou nou ka wè, se li menm ki ban nou zòrèy pou nou ka tande.

Pwoveb 20:13 (HCB)
Pa renmen dòmi twòp pou ou pa vin pòv. Souke kò ou. W'a jwenn kont manje pou ou manje.

Pwoveb 20:14 (HCB)
Lè moun ap machande, machandiz pa janm bon. Fini yo fin achte, y'ap mache di jan yo fè yon bon zafè.

Pwoveb 20:15 (HCB)
Lè yon moun ki gen konprann ap pale sa gen plis valè pase kantite lò ak pyè ki koute chè.

Pwoveb 20:16 (HCB)
Si yon moun sòt jouk pou li asepte bay pawòl li pou dèt yon etranje, se pou yo pran ata rad ki sou li jouk lòt la peye.

Pwoveb 20:17 (HCB)
Lajan ou fè nan move kondisyon ka dous lè ou fèk genyen l'. Men, apre sa, se tankou ti wòch anba dan.

Pwoveb 20:18 (HCB)
Pran konsèy, tou sa ou gen lide fè ap mache byen. Pa kouri fè lagè san ou pa konnen sa w'ap fè.

Pwoveb 20:19 (HCB)
Bouch alèlè pa kenbe sekrè. Pa mele ak moun ki pale twòp.

Pwoveb 20:20 (HCB)
Moun ki bay manman l' ak papa l' madichon p'ap viv lontan.

Pwoveb 20:21 (HCB)
Richès ou ranmase fasil fasil p'ap janm vin yon benediksyon pou ou.

Pwoveb 20:22 (HCB)
Pa janm di se ou ki pou vanje tèt ou. Mete konfyans ou nan Seyè a, l'a delivre ou.

Pwoveb 20:23 (HCB)
Seyè a pa ka sipòte moun k'ap sèvi ak de pwa de mezi. Sa pa bon pou ou sèvi ak move balans.

Pwoveb 20:24 (HCB)
Se Seyè a ki louvri chemen devan nou. Ki jan lèzòm ka rive konprann lavi?

Pwoveb 20:25 (HCB)
Pa prese fè Bondye pwomès. Ou ka règrèt sa pita.

Pwoveb 20:26 (HCB)
Yon wa ki gen bon konprann ap rive dekouvri tout mechan yo. L'ap san pitye lè l'ap pini yo.

Pwoveb 20:27 (HCB)
Se Seyè a ki ban nou konsyans nou. Se tankou yon lanp k'ap klere pou fè nou wè tou sa n'ap fè.

Pwoveb 20:28 (HCB)
Yon wa ap rete wa si li se nèg serye, si li toujou kenbe pawòl li. L'ap toujou wa si li pa nan patipri.

Pwoveb 20:29 (HCB)
Se kouraj ki fè valè yon jenn gason. Men, pou granmoun, se cheve blan l' yo ki fè valè l'.

Pwoveb 20:30 (HCB)
Move esperyans ka fè nou chanje. Malè ka fè nou vin gen bon santiman.

Previous Chapter
« Pwoveb 19

Next Chapter
Pwoveb 21 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31