Pwoveb 21 | HCB Bible Study

Pwoveb 21:1 (HCB)
Seyè a dirije lespri yon wa, menm jan li dirije yon kouran dlo nan kannal. Li mennen l' kote li vle.

Pwoveb 21:2 (HCB)
Lèzòm mete nan lide yo tou sa y'ap fè dwat. Men, pa bliye, se Seyè a k'ap jije sa ki nan kè yo.

Pwoveb 21:3 (HCB)
Fè sa ki dwat. Pa nan patipri. Sa fè Seyè a plezi pi plis pase bèt ou ta touye pou li.

Pwoveb 21:4 (HCB)
Fè awogans, gonfle lestonmak yo sou moun, se sa ase mechan yo ap chache fè. Tou sa se peche.

Pwoveb 21:5 (HCB)
Lè ou pran san ou pou ou travay, tou sa w'ap fè ap ba ou benefis. Men, lè ou twò prese, ou p'ap janm gen anyen.

Pwoveb 21:6 (HCB)
Moun k'ap mache bay manti pou fè lajan ap kouri dèyè van. Se lanmò y'ap chache.

Pwoveb 21:7 (HCB)
Move zak mechan yo ap fè a ap fini ak yo, paske yo derefize fè sa ki dwat devan Bondye.

Pwoveb 21:8 (HCB)
Moun k'ap fè sa ki mal ap mache sou chemen plen detou. Men, inonsan yo fè sa ki dwat.

Pwoveb 21:9 (HCB)
Pito ou rete pou kont ou nan yon kwen galata pase pou ou rete nan kay ak yon fanm ki toujou ap chache kont.

Pwoveb 21:10 (HCB)
Mechan toujou anvi fè sa ki mal. Yo pa gen pitye pou pesonn.

Pwoveb 21:11 (HCB)
Lè yo pini yon moun ki renmen pase lòt nan betiz, se yon leson pou moun ki pa gen lespri. Men, moun ki gen bon konprann, lè yo pale avè l', li vin gen plis konesans.

Pwoveb 21:12 (HCB)
Bondye pa nan patipri, li konnen sa k'ap pase anndan kay mechan yo. Li fè malè tonbe sou yo.

Pwoveb 21:13 (HCB)
Si ou fèmen zòrèy ou pou ou pa tande pòv k'ap mande ou lacharite, konsa tou pesonn p'ap tande ou lè w'a mande sekou.

Pwoveb 21:14 (HCB)
Lè yon moun fache sou ou, si ou ba li yon kado an kachèt, w'a fè l' vin frèt. Wi, yon kado glise nan pòch li ap kase fe l'.

Pwoveb 21:15 (HCB)
Lè yo rann jistis san patipri, moun ki mache dwat yo gen kè kontan. Men, mechan yo gen kè kase.

Pwoveb 21:16 (HCB)
Lè yon moun pèdi chemen l' pou l' aji tankou moun fou, se lanmò k'ap fè li siyon.

Pwoveb 21:17 (HCB)
Lè ou renmen plezi, w'ap toujou pòv. Lè ou renmen bon bweson ak bon manje, ou p'ap janm gen lajan.

Pwoveb 21:18 (HCB)
Lè pou malè ta tonbe sou moun ki mache dwat yo, se sou mechan yo li tonbe.

Pwoveb 21:19 (HCB)
Pito ou viv pou kont ou nan yon dezè pase pou ou viv nan kay ak yon fanm ki tout tan ap chache kont, ki tout tan ap plenyen.

Pwoveb 21:20 (HCB)
Moun ki gen konprann ap gen gwo richès ak kantite bon manje lakay yo. Men, moun sòt gaspiye tout lajan yo.

Pwoveb 21:21 (HCB)
Lè yon moun pa fè lenjistis, lè li gen bon kè, l'ap viv lontan. Tout zafè l' ap mache byen, y'ap respekte l'.

Pwoveb 21:22 (HCB)
Yon nonm lespri ka pran yon lavil kote ki gen anpil grannèg. L'ap kraze fòs ki t'ap fè yo pa pè anyen an.

Pwoveb 21:23 (HCB)
Veye bouch ou ak lang ou, ou p'ap nan pwoblèm.

Pwoveb 21:24 (HCB)
Moun k'ap pase Bondye nan betiz, se moun ki radi, se moun ki awogan. Yo pa gen konsiderasyon pou pesonn.

Pwoveb 21:25 (HCB)
Parese pa anvi leve ni lou ni lejè. Se sa k'ap touye l' la tou.

Pwoveb 21:26 (HCB)
Tout lajounen l'ap kalkile sou sa l' ta renmen genyen. Men, moun ki mache dwat yo gen pou bay, y'ap bay san gad dèyè.

Pwoveb 21:27 (HCB)
Seyè a pa ka sipòte lè mechan yo ap ofri bèt pou touye pou li. Sa pi mal toujou lè yo ofri bèt pou touye ba li avèk lide mechanste dèyè tèt yo.

Pwoveb 21:28 (HCB)
Temwen k'ap bay manti gen pou l' mouri. Men, yo p'ap koupe pawòl nan bouch moun ki peze sa l'ap di.

Pwoveb 21:29 (HCB)
Mechan toujou pran pòz radi l'. Men, moun ki mache dwat la konnen sa l'ap fè.

Pwoveb 21:30 (HCB)
Devan Seyè a pa gen ni moun konnen, ni moun lespri, ni moun ki gen bon konprann.

Pwoveb 21:31 (HCB)
Moun pare chwal pou y' al fè lagè, men se Seyè a k'ap deside kilès k'ap genyen batay la.

Previous Chapter
« Pwoveb 20

Next Chapter
Pwoveb 22 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters