Pwoveb 26 | HCB Bible Study

Pwoveb 26:1 (HCB)
Menm jan moun pa bezwen tann pou fè gwo fredi nan sezon chalè, ni pou lapli tonbe nan sezon rekòt, konsa tou, moun san konprann pa bezwen tann pou yo fè lwanj li.

Pwoveb 26:2 (HCB)
Madichon pa ka fè ou anyen si ou pa antò. Se tankou ti zwezo k'ap vòltije sou branch bwa, ziwondèl k'ap vole nan syèl la yo ye.

Pwoveb 26:3 (HCB)
Fwèt pou chwal, baboukèt pou bourik, baton pou do moun ki san konprann.

Pwoveb 26:4 (HCB)
Pa reponn moun sòt yo menm jan yo pale a, pou ou pa parèt sòt menm jan ak yo.

Pwoveb 26:5 (HCB)
Reponn moun sòt yo dapre jan yo pale a, w'a fè yo wè se moun sòt yo ye.

Pwoveb 26:6 (HCB)
Yon moun ki voye yon moun sòt fè komisyon, se tankou si li te koupe janm li. Se traka l'ap chache bay tèt li.

Pwoveb 26:7 (HCB)
Yon moun ki san konprann sèvi ak yon pwovèb menm jan yon moun bwete sèvi ak move janm lan.

Pwoveb 26:8 (HCB)
Fè lwanj yon moun ki san konprann, se tankou si ou te mare wòch la anvan ou tire fistibal la.

Pwoveb 26:9 (HCB)
Yon moun san konprann k'ap bay yon pwovèb, se tankou yon moun sou k'ap chache wete yon pikan nan dwèt li.

Pwoveb 26:10 (HCB)
Patwon ki pran nenpòt moun san konprann osinon nenpòt moun k'ap pase nan lari pou travay pou li, se yon danje pou tout moun.

Pwoveb 26:11 (HCB)
Menm jan yon chen tounen vin manje sa li vonmi, se konsa moun san konprann yo ap toujou fè sa y'ap fè a.

Pwoveb 26:12 (HCB)
Gen plis espwa pou yon moun ki san konprann pase pou yon moun ki mete nan tèt li li konprann.

Pwoveb 26:13 (HCB)
Parese a di: Gen bèt nan bwa sou wout la. Gen yon lyon nan lari a.

Pwoveb 26:14 (HCB)
Parese a ap vire adwat agoch nan kabann li, menm jan yon pòt ap vire louvri fèmen sou gon li yo.

Pwoveb 26:15 (HCB)
Parese a pran kiyè l' nan men l'. Men, pou l' leve l' mete nan bouch li, se yon pakèt afè.

Pwoveb 26:16 (HCB)
Parese mete nan tèt li li gen plis konprann pase sèt moun lespri ki konn sa y'ap di.

Pwoveb 26:17 (HCB)
Moun k'ap foure bouch nan koze ki pa gade l', se tankou moun k'ap rale ke chen li jwenn sou gran chemen.

Pwoveb 26:18 (HCB)
(we vèsè pwochen)

Pwoveb 26:19 (HCB)
Moun k'ap mache twonpe moun, apre sa pou li di: Aa monchè! Se jwe mwen t'ap jwe, moun konsa tankou moun fou k'ap voye bwa dife ak wòch pou touye moun.

Pwoveb 26:20 (HCB)
Kote ki pa gen bwa, pa gen dife. Kote ki pa gen tripòt, pa gen kont.

Pwoveb 26:21 (HCB)
Chabon kenbe recho a limen. Bwa pa kite dife a mouri. Konsa tou, moun ki renmen chache kont toujou ap pouse dife.

Pwoveb 26:22 (HCB)
Tripotay dous nan zòrèy moun ki vle tande yo. Sa mache nan san yo.

Pwoveb 26:23 (HCB)
Yon moun ki gen bèl pawòl nan bouch li men ki gen move kè, se tankou bèl penti sou bwa pouri.

Pwoveb 26:24 (HCB)
Ipokrit ki rayi moun toujou ap bay bèl pawòl. Men, nan kè l', se twonpe l'ap twonpe moun.

Pwoveb 26:25 (HCB)
Lè l'ap pale konsa, ou pa bezwen kwè l', paske nan fon kè l', se mechanste ase ki genyen.

Pwoveb 26:26 (HCB)
Li te mèt kache sa, tout moun gen pou wè mechanste l'ap fè yo.

Pwoveb 26:27 (HCB)
Moun k'ap tann pèlen pou lòt se yo menm k'ap pran ladan li. Moun ki konmanse woule wòch la, se li menm ankò wòch la ap kraze.

Pwoveb 26:28 (HCB)
Fòk ou rayi yon moun vre pou fè manti sou li. Lè w'ap flate moun, se tèt ou w'ap fè tò.

Previous Chapter
« Pwoveb 25

Next Chapter
Pwoveb 27 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters