Pwoveb 14:1 (HCB)
Bon konprann yon fanm fè kay li mache byen. Men, yon fanm sòt ap kraze kay li ak pwòp men li.

Pwoveb 14:2 (HCB)
Moun ki mache dwat, se yo ki gen krentif pou Seyè a. Men, moun k'ap mache kwochi pa pran Bondye pou anyen.

Pwoveb 14:3 (HCB)
Pawòl nan bouch moun san konprann, se fwèt pou dèyè yo. Men, pawòl nan bouch moun ki gen bon konprann, se pwoteksyon yo.

Pwoveb 14:4 (HCB)
Kote ki pa gen bèf pou rale chari pa gen rekòt. Lè bèt ou anfòm w'ap fè bon rekòt.

Pwoveb 14:5 (HCB)
Yon bon temwen p'ap bay manti. Yon fo temwen p'ap di verite.

Pwoveb 14:6 (HCB)
Moun ki gen lògèy plen kè yo, yo mèt chache konesans, yo p'ap janm jwenn li. Men, pou moun ki gen lespri, se bagay fasil.

Pwoveb 14:7 (HCB)
Pa pwoche bò kote moun san konprann. Se pa anba bouch yo w'ap pran anyen.

Pwoveb 14:8 (HCB)
Moun ki gen bon konprann konnen sa l'ap fè. Moun sòt mete nan tèt li li konnen, men se tèt li l'ap twonpe.

Pwoveb 14:9 (HCB)
Moun sòt pran peche sèvi jwèt. Men, moun k'ap mache dwat pare pou rekonèt tò yo.

Pwoveb 14:10 (HCB)
Lè ou nan lapenn, se ou ki konnen sa w'ap soufri. Konsa tou, lè kè ou kontan, pesonn pa ka kontan avè ou.

Pwoveb 14:11 (HCB)
Fanmi mechan yo gen pou disparèt. Men, fanmi moun k'ap mache dwat yo gen pou devlope.

Pwoveb 14:12 (HCB)
Chemen ou kwè ki bon an, se li ki mennen tou dwat nan lanmò.

Pwoveb 14:13 (HCB)
Ou mèt ap ri, kè ou ka nan lapenn. Apre kontantman, se kè sere.

Pwoveb 14:14 (HCB)
Moun k'ap fè sa ki mal ap jwenn sa l'ap chache a. Konsa tou, moun k'ap fè byen an ap jwenn rekonpans li.

Pwoveb 14:15 (HCB)
Yon moun sòt ap kwè tou sa yo di l'. Men, moun ki gen konprann veye kote l'ap mete pye l'.

Pwoveb 14:16 (HCB)
Moun ki gen bon konprann pran prekosyon yo, yo egzante malè. Moun sòt yo awogan, yo toujou konprann zafè yo bon.

Pwoveb 14:17 (HCB)
Lè yon moun gen san wo, l'ap toujou fè betiz. Men, moun ki kalkile anvan ap toujou rete kè pòpòz.

Pwoveb 14:18 (HCB)
Moun san konprann aji tankou moun fou. Men, rekonpans moun ki gen lespri se konesans.

Pwoveb 14:19 (HCB)
Move moun gen pou wete chapo devan bon moun. Moun mechan gen pou bese tèt devan moun k'ap mache dwat yo.

Pwoveb 14:20 (HCB)
Lè ou pòv, ou pa gen zanmi. Lè ou rich, ou plen zanmi.

Pwoveb 14:21 (HCB)
Se yon peche ou fè lè ou meprize frè parèy ou. Men, ala bon sa bon pou moun ki gen pitye pou pòv malere!

Pwoveb 14:22 (HCB)
Lè w'ap chache fè sa ki mal, ou pèdi chemen ou. Men, lè w'ap chache fè sa ki byen, moun ap toujou renmen ou, yo p'ap janm lage ou.

Pwoveb 14:23 (HCB)
Travay, w'a jwenn tou sa ou bezwen. Rete chita ap pale anpil ap rann ou pòv.

Pwoveb 14:24 (HCB)
Rekonpans moun ki gen konprann se konesans. Moun san konprann ap toujou aji tankou moun sòt.

Pwoveb 14:25 (HCB)
Lè yon temwen di laverite, li sove lavi inonsan. Lè li bay manti, li twonpe jij yo.

Pwoveb 14:26 (HCB)
Lè yon moun gen krentif pou Bondye, li gen kote pou l' apiye. Pitit li yo ap jwenn pwoteksyon bò kot Bondye.

Pwoveb 14:27 (HCB)
Gen krentif pou Bondye, w'a gen lavi. Ou p'ap tonbe lè lavi ou an danje.

Pwoveb 14:28 (HCB)
Tout pouvwa yon wa, se lè peyi l'ap kòmande a gen anpil moun. Men, lè pa gen moun nan peyi a, wa a pa vo anyen.

Pwoveb 14:29 (HCB)
Moun ki pa fè kòlè fasil, se moun ki gen bon konprann. Men, moun ki gen san wo fè wè jan li sòt.

Pwoveb 14:30 (HCB)
Lè ou gen kè ou poze, ou kenbe kò ou an sante. Men, anvye sò lòt moun se tankou yon maladi k'ap manje ou nan zo.

Pwoveb 14:31 (HCB)
Lè w'ap peze pòv malere, se Bondye ki fè l' la w'ap derespekte. Men, lè ou aji byen ak pòv, se pi bèl sèvis ou ka rann Bondye.

Pwoveb 14:32 (HCB)
Mechanste mechan an, se sa k'ap jete l' atè. Men, moun ki fè sa ki byen, y'ap pwoteje l' menm lè lavi l' an danje.

Pwoveb 14:33 (HCB)
Moun ki gen konprann, se tout tan y'ap chache konnen. Men, moun sòt pa chache konnen anyen.

Pwoveb 14:34 (HCB)
Lè gen jistis nan yon peyi, sa leve peyi a. Men, peche lenjistis se yon wont pou yon nasyon.

Pwoveb 14:35 (HCB)
Wa a kontan lè moun k'ap travay avè l' yo fè travay yo byen. Men, l'ap move sou moun k'ap fè travay yo mal.
Previous Chapter
« Pwoveb 13
Next Chapter
Pwoveb 15 »

Pwoveb (HCB) Chapter Selection

HCB Book Selection List

View full list of HCB Bible Books and Chapters