Pwoveb 31 | HCB Bible Study

Pwoveb 31:1 (HCB)
Men Pawòl wa Lemwèl, men konsèy manman l' te ba li:

Pwoveb 31:2 (HCB)
Kisa pou m' di ou, pitit mwen, pitit ki soti nan zantray mwen? Se mwen ki te mande Bondye pou l' ban mwen ou. Kisa pou m' di ou?

Pwoveb 31:3 (HCB)
Pa gaspiye kouray ou nan fanm. Veye zo ou ak fanm k'ap fè malè chèf yo.

Pwoveb 31:4 (HCB)
Lemwèl monchè, yon wa pa fèt pou nan bwè bweson. Chèf pa fèt pou nan bwè gwòg.

Pwoveb 31:5 (HCB)
Lè yo bwè konsa, yo bliye lòd yo te bay. Yo p'ap pran ka malere yo.

Pwoveb 31:6 (HCB)
Se moun ki dekouraje ak lavi ki tonbe nan gwòg. Se moun ki gen gwo lapenn nan kè yo ki lage kò yo nan bweson.

Pwoveb 31:7 (HCB)
Yo bwè pou yo bliye mizè yo, pou yo pa chonje lapenn yo.

Pwoveb 31:8 (HCB)
Louvri bouch ou pale pou moun ki pa ka pale pou tèt yo. Defann kòz moun ki san sekou yo.

Pwoveb 31:9 (HCB)
Pale pou yo. Pa fè patipri. Defann kòz malere yo ak endijan yo.

Pwoveb 31:10 (HCB)
Sa pa fasil pou moun jwenn yon bon madanm. Lè li jwenn li, li gen plis valè pase yon boul lò.

Pwoveb 31:11 (HCB)
Mari l' mete tout konfyans li nan li. Tout bagay ap mache byen lakay li.

Pwoveb 31:12 (HCB)
Madanm lan p'ap janm aji mal ak mari l', l'ap pase tout lavi l' ap fè l' byen.

Pwoveb 31:13 (HCB)
Li chache lenn mouton ak fil swa, li travay yo fè twal ak men l'.

Pwoveb 31:14 (HCB)
Tankou bato k'ap pote machandiz, li al byen lwen chache manje mete nan kay la.

Pwoveb 31:15 (HCB)
Solèy poko leve, li gen tan sou pye l', l'ap pare manje pou moun nan kay la. L'ap di sèvant yo sa pou yo fè.

Pwoveb 31:16 (HCB)
Li fè lide sou yon tè, li achte l' ak lajan li fè ak men l'. Li fè jaden rezen sou li.

Pwoveb 31:17 (HCB)
Li mare ren l', li twouse manch rad li pou l' travay.

Pwoveb 31:18 (HCB)
Li santi zafè l' ap mache byen, li rete byen ta lannwit ap travay.

Pwoveb 31:19 (HCB)
Li file koton, li koud rad li.

Pwoveb 31:20 (HCB)
Li lonje men l' bay pòv. Li pran ka malere.

Pwoveb 31:21 (HCB)
Li pa pè fredi pou moun lakay li, paske tout moun gen rad cho pou mete sou yo.

Pwoveb 31:22 (HCB)
Li fè kouvèti lenn pou kabann yo. Tout rad li yo fèt ak twal wouj tise byen sere.

Pwoveb 31:23 (HCB)
Mari l', se yonn nan chèf fanmi lavil la. Tout moun lavil la ap nonmen non l' an byen.

Pwoveb 31:24 (HCB)
Madanm li fe rad pou l' vann, li fè bèl senti, li vann yo ak machann.

Pwoveb 31:25 (HCB)
Li gen anpil kouraj, tout moun respekte l', li pa pè denmen.

Pwoveb 31:26 (HCB)
Lè li louvri bouch li, se bon konsèy li bay. Li toujou gen bon pawòl nan bouch li.

Pwoveb 31:27 (HCB)
Li konnen vire tounen tout moun nan kay la. Li toujou gen yon bagay l'ap fè.

Pwoveb 31:28 (HCB)
Tout pitit li yo ap fè l' konpliman. Mari l' menm ap fè lwanj li.

Pwoveb 31:29 (HCB)
L'ap di: Mwen konnen anpil madanm. Men ou menm, nanpwen tankou ou!

Pwoveb 31:30 (HCB)
Bèl fanm pa di bon madanm pou sa. Bèl figi pa la pou lontan. Men, y'a fè lwanj yon fanm ki gen krentif pou Seyè a.

Pwoveb 31:31 (HCB)
Ba li sa ki pou li a. Lè y'a wè sa l' fè, se pou tout moun fè lwanj li.

Previous Chapter
« Pwoveb 30

Next Chapter
Eklezyas 1 »

Pwoveb (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

HCB Book Selection List

View full list of HCB Bible Books and Chapters