Som 94:1 (HCB)
Seyè, ou menm Bondye ki gen dwa tire revanj lan, parèt non pou fè yo wè ki moun ou ye.

Som 94:2 (HCB)
Ou menm k'ap jije tout moun sou latè, leve non! Bay moun k'ap pran pòz gwokolèt yo sa yo merite!

Som 94:3 (HCB)
Kilè mechan yo va sispann fè fèt? Wi, Seyè, kilè y'a sispann?

Som 94:4 (HCB)
Kilè moun k'ap fè sa ki mal yo va sispann fè grandizè? Kilè y'a sispann fè bèl diskou pou rakonte krim yo fè?

Som 94:5 (HCB)
Seyè, y'ap kraze pèp ou a, y'ap peze moun pa ou yo.

Som 94:6 (HCB)
Y'ap koupe kou vèv yo, y'ap koupe kou timoun ki san papa yo, y'ap ansasinen etranje k'ap viv nan peyi a.

Som 94:7 (HCB)
Lè konsa yo di: Seyè a pa wè nou! Bondye pèp Izrayèl la pa okipe bagay konsa!

Som 94:8 (HCB)
Nou menm, bann san konprann, manyè fè atansyon non! Bann moun fou, kilè n'a konprann?

Som 94:9 (HCB)
Bondye ki bay zòrèy, ki jan pou l' pa ta ka tande? Bondye ki fè je, ki jan pou l' pa ta ka wè?

Som 94:10 (HCB)
Limenm ki reskonsab tout nasyon yo, ki jan pou l' pa ta ka pini yo? Limenm k'ap bay moun tout kalite konesans, ki jan pou l' pa ta ka konnen?

Som 94:11 (HCB)
Seyè a konnen lide lèzòm gen nan tèt yo. Li konnen sa pa vo anyen.

Som 94:12 (HCB)
Ala bon sa bon, Seyè, lè w'ap korije yon moun, pou fè l' konnen sa ki nan lalwa ou,

Som 94:13 (HCB)
pou l' ka rete ak kè poze lè jou malè a rive, jouk y'a fouye twou pou antere mechan an.

Som 94:14 (HCB)
Seyè a p'ap voye pèp li a jete, li p'ap vire do bay moun ki pou li yo.

Som 94:15 (HCB)
Lè sa a, moun va jwenn jistis nan tribinal, tout moun ki mache dwat va dakò avèk sa.

Som 94:16 (HCB)
Kilès ki va kanpe pou mwen kont mechan yo? Kilès ki va pran pou mwen kont moun k'ap fè mal yo?

Som 94:17 (HCB)
Si se pa t' Seyè a ki te sekou mwen, gen lontan depi mwen ta mouri.

Som 94:18 (HCB)
Lè mwen di: Men m'ap tonbe wi! Se ou menm, Seyè, ki soutni m' paske ou gen bon kè.

Som 94:19 (HCB)
Lè m' nan tèt chaje, lè mwen pa konn sa pou m' fè, se ou menm ki ban m' kouraj, se ou menm ki fè kè m' kontan.

Som 94:20 (HCB)
Eske ou nan konfyolo avèk jij pèvèti sa yo, k'ap fè mechanste yo pase pou lalwa?

Som 94:21 (HCB)
Y'ap fè konplo sou moun ki mache dwat yo, y'ap kondannen inonsan yo amò.

Som 94:22 (HCB)
Men, Seyè a se tout defans mwen. Bondye mwen, se twou wòch kote m' jwenn pwoteksyon.

Som 94:23 (HCB)
L'ap fè mechanste yo a tonbe sou pwòp tèt yo, l'ap fè peche yo a touye yo. Seyè a, Bondye nou an, ap disparèt yo.
Previous Chapter
« Som 93
Next Chapter
Som 95 »

HCB Book Selection List

View full list of HCB Bible Books and Chapters