Som 132:1 (HCB)
Se yon chante pou yo chante lè y'ap moute lavil Jerizalèm. Seyè, pa bliye David. Chonje tout traka li te bay tèt li pou ou.

Som 132:2 (HCB)
Seyè, chonje sèman li te fè ou, pwomès li te fè ou, ou menm Bondye Jakòb la ki gen fòs, lè l' te di:

Som 132:3 (HCB)
Mwen p'ap antre nan kay kote m' rete a, mwen p'ap moute kouche sou kabann mwen,

Som 132:4 (HCB)
mwen p'ap bay kò m' repo, mwen p'ap fèmen je m',

Som 132:5 (HCB)
toutotan mwen pa jwenn yon kote pou Seyè a, yon kay pou Bondye Jakòb la ki gen fòs ka rete.

Som 132:6 (HCB)
Nou te tande Bwat Kontra a te lavil Efrata. Men, nou jwenn li nan jaden Jearim yo.

Som 132:7 (HCB)
Ann al lakay Seyè a. Ann al devan fotèy li pou n' adore l'.

Som 132:8 (HCB)
Leve non, Seyè, vin kote pou ou pran repo a. Vini non ansanm ak Bwat Kontra ou la ki fè nou wè jan ou gen pouvwa.

Som 132:9 (HCB)
Se pou prèt yo fè konnen jan ou bay pèp ou a delivrans. Se pou tout pèp ou a rele sitèlman yo kontan.

Som 132:10 (HCB)
Poutèt pwomès ou te fè David, sèvitè ou la, tanpri, Seyè, pa vire do bay moun ou te chwazi a.

Som 132:11 (HCB)
Seyè a te fè David, sèvitè li a, yon pwomès, l'ap toujou kenbe pawòl li: Se yonn nan pitit ou yo m'ap mete chita sou fotèy ou a.

Som 132:12 (HCB)
Si pitit ou yo kenbe kontra mwen fè ak yo a, si yo kenbe prensip mwen ba yo, pitit pa yo tou va toujou chita son fotèy ou a.

Som 132:13 (HCB)
Seyè a te chwazi mòn Siyon, se la li vle bati kay li.

Som 132:14 (HCB)
Se la mwen chwazi pou m' toujou pran repo, se la m'ap rete, paske se sa mwen vle.

Som 132:15 (HCB)
M'a voye benediksyon sou tou sa li bezwen pou l' viv. M'a bay pòv li yo manje plen vant yo.

Som 132:16 (HCB)
M'a delivre prèt li yo, m'a fè tout pèp Bondye a rele sitèlman yo kontan.

Som 132:17 (HCB)
Se la m'ap fè yonn nan pitit David yo tounen yon gwo wa. Mwen p'ap kite limyè a soti nan fanmi moun mwen chwazi a.

Som 132:18 (HCB)
M'ap fè lènmi l' yo wont, kouwòn ki sou tèt li a ap toujou rete byen klere.
Previous Chapter
« Som 131
Next Chapter
Som 133 »

HCB Book Selection List

View full list of HCB Bible Books and Chapters