Som 88:1 (HCB)
Seyè, Bondye, se ou menm ki delivrans mwen! Lajounen kou lannwit m'ap rele nan pye ou!

Som 88:2 (HCB)
Se pou lapriyè m' rive nan zòrèy ou. Koute byen sa m'ap mande ou.

Som 88:3 (HCB)
Anpil malè tonbe sou mwen, mwen pa kapab ankò. Mwen prèt pou mouri.

Som 88:4 (HCB)
Mwen tankou moun ki sou dènye souf li, tankou moun ki pa gen fòs ankò.

Som 88:5 (HCB)
Mwen tonbe atè tankou yon moun mouri, tankou yon moun yo touye ki kouche nan simityè. Wi, tankou yon moun ou bliye nèt, tankou yon moun ou pa ka fè anyen ankò pou li.

Som 88:6 (HCB)
Ou voye m' jete nan yon gwo twou byen fon, kote ki fè nwa anpil, nan yon twou san fon.

Som 88:7 (HCB)
Mwen santi ou ankòlè anpil sou mwen. Se kraze w'ap kraze m' anba men ou.

Som 88:8 (HCB)
Ou fè tout zanmi m' yo lage m'. Yo yonn pa ka santi m' bò kote yo! Mwen fèmen yon kote mwen pa ka soti.

Som 88:9 (HCB)
Je m' ap boule m' tèlman m'ap soufri. Seyè, se chak jou m'ap rele ou, m'ap louvri de bra m' ba ou!

Som 88:10 (HCB)
Eske se pou moun mouri ou fè mirak? Eske mò ka leve pou fè lwanj ou?

Som 88:11 (HCB)
Eske moun ki anba tè ka fè konnen jan ou renmen nou? Eske moun ki nan twou san fon an ka fè konnen jan ou toujou kenbe pawòl ou?

Som 88:12 (HCB)
Eske moun ki nan fènwa a ka wè mèvèy ou yo? Eske moun ki nan peyi kote yo bliye tout bagay la ka wè jan ou bon!

Som 88:13 (HCB)
Seyè, m'ap rele ou vin ede mwen. Se chak maten m'ap lapriyè nan pye ou.

Som 88:14 (HCB)
Seyè, poukisa ou voye m' jete lwen ou konsa? Poukisa ou kache figi ou pou mwen?

Som 88:15 (HCB)
Depi mwen jenn gason se soufri m'ap soufri, m'ap pase ra lanmò. Ou sitèlman pini mwen, mwen pa konn sa pou m' fè ankò.

Som 88:16 (HCB)
Nan kòlè ou, ou fè m' pase kont tray mwen. Se fini ou fini avè m' tèlman ou pini m'.

Som 88:17 (HCB)
Tout lajounen ou sènen m' tankou dlo inondasyon, ou fèmen m' toupatou.

Som 88:18 (HCB)
Ou te fè tout kanmarad mwen yo ak zanmi m' yo vire do ban mwen. Moun mwen te konn rakonte ti koze m' yo disparèt.
Previous Chapter
« Som 87
Next Chapter
Som 89 »

HCB Book Selection List

View full list of HCB Bible Books and Chapters