Som 104:1 (HCB)
Kite m' di Seyè a mèsi! Seyè, Bondye mwen, ala gwo pouvwa ou gwo! Devan ou se respè, se chapo ba!

Som 104:2 (HCB)
Ou vlope kò ou nan yon gwo limyè. Ou louvri syèl la tankou yon tant pou ou rete.

Som 104:3 (HCB)
Ou bati kay ou sou nwaj yo ki plen dlo. Ou pran nwaj yo sèvi ou cha, yon kouran van ap pouse ou ale.

Som 104:4 (HCB)
Ou fè van yo pote komisyon pou ou. Ou fè zèklè yo tounen sèvitè ou.

Som 104:5 (HCB)
Ou mete latè kanpe fèm sou fondasyon li. Anyen pa ka brannen l'.

Som 104:6 (HCB)
Ou mete lanmè sou li tankou yon rad, dlo te kouvri tout mòn yo.

Som 104:7 (HCB)
Men, lè ou parèt devan yo, yo pran kouri. Lè yo tande loraj ou gwonde, yo met deyò.

Som 104:8 (HCB)
Yo kouri desann sou mòn yo, yo pase nan fon yo, y' al pran plas ou te pare pou yo.

Som 104:9 (HCB)
Ou ba yo limit pou yo pa janm depase, pou yo pa tounen vin kouvri latè ankò.

Som 104:10 (HCB)
Ou fè sous dlo koule nan fon yo. Ou fè dlo koule nan mitan mòn yo.

Som 104:11 (HCB)
Yo bay dlo pou bèt nan bwa yo bwè. Bourik nan bwa yo vin bwè lè yo swaf dlo.

Som 104:12 (HCB)
Zwezo fè nich sou pyebwa ki bò dlo yo. Y'ap chante byen fò nan tout branch yo.

Som 104:13 (HCB)
Ou rete nan syèl la, ou voye lapli wouze mòn yo. Ou kouvri tè a ak benediksyon ou.

Som 104:14 (HCB)
Ou fè zèb pouse pou bèt yo manje. Ou fè plant moun bezwen yo grandi pou latè ka donnen manje,

Som 104:15 (HCB)
pou latè ka donnen rezen ki bay diven pou fè kè lèzòm kontan, lwil pou fè figi yo fre, pen pou ba yo fòs.

Som 104:16 (HCB)
Pyebwa Seyè yo, pye sèd li menm li te plante nan peyi Liban an, yo jwenn tou sa yo bezwen.

Som 104:17 (HCB)
Se la zwazo fè nich yo. Sigòy fè kay yo sou tèt pyebwa yo.

Som 104:18 (HCB)
Mòn apik yo se pou kabrit mawon yo ye. Daman kache nan twou wòch yo.

Som 104:19 (HCB)
Ou te fè lalin pou l' make jou yo. Solèy la konnen kilè pou l' kouche.

Som 104:20 (HCB)
Ou fè fènwa tonbe sou peyi a, li lannwit. Tout bèt nan rakbwa yo soti deyò.

Som 104:21 (HCB)
Jenn lyon yo ap gwonde, y'ap chache manje. Y'ap mande Bondye ba yo manje.

Som 104:22 (HCB)
Lè solèy leve, yo wete kò yo, y' al kouche nan twou yo.

Som 104:23 (HCB)
Moun soti pou y' al travay, wi, pou y' al travay jouk solèy kouche.

Som 104:24 (HCB)
Seyè, ou fè anpil bagay! Ou fè yo avèk bon konprann. Latè plen ak bagay ou fè.

Som 104:25 (HCB)
Gade gwo lanmè a, li laj, li fon. Gen kantite bèt k'ap viv ladan l', gwo kou piti.

Som 104:26 (HCB)
Se sou li gwo batiman yo ap pwonmennen. Gwo bèt lanmè ou te fè a, levyatan an, ap jwe ladan l'.

Som 104:27 (HCB)
Se sou ou tout bèt sa yo konte, pou ou ba yo manje lè yo bezwen.

Som 104:28 (HCB)
Ou ba yo manje, yo manje. Ou louvri men ou, yo manje plen vant yo.

Som 104:29 (HCB)
Vire ou vire do ou, yo pran tranble. Lè ou wete souf yo, yo mouri frèt, yo tounen nan pousyè kote yo te soti a.

Som 104:30 (HCB)
Men, lè ou soufle souf ou, ou bay lavi ankò. Konsa, ou bay latè yon lòt figi.

Som 104:31 (HCB)
Se pou bèl pouvwa Seyè a rete jan l' ye a pou tout tan. Se pou Seyè a kontan ak tou sa li fè.

Som 104:32 (HCB)
Li gade latè, latè pran tranble. Li manyen mòn yo, mòn yo pran fè lafimen.

Som 104:33 (HCB)
M'ap pase tout lavi m' ap chante pou Seyè a. M'ap fè lwanj Bondye pandan tout tan m'ap viv la.

Som 104:34 (HCB)
Mwen ta swete pawòl mwen fè l' plezi, paske se li ki fè kè m' kontan.

Som 104:35 (HCB)
Se pou moun k'ap fè sa ki mal yo disparèt sou latè. Se pou pa gen mechan ankò! Kite m' di Seyè a mèsi! Lwanj pou Seyè a!
Previous Chapter
« Som 103
Next Chapter
Som 105 »

HCB Book Selection List

View full list of HCB Bible Books and Chapters