Job 33 | HCB Bible Study

Job 33:1 (HCB)
Atòkile, Jòb, tanpri, koute sa m'ap di ou. Louvri zòrèy ou byen pou ou tande m'.

Job 33:2 (HCB)
M' pare pou m' di dènye sa ki vin nan bouch mwen.

Job 33:3 (HCB)
M' pral di tou sa ki nan kè m'. Se verite a tou senp mwen pral pale.

Job 33:4 (HCB)
Se lespri Bondye a ki fè m'. Se souf Bondye ki gen tout pouvwa a ki ban m' lavi.

Job 33:5 (HCB)
Si ou kapab, w'a reponn mwen. Pare kò ou. Pran pozisyon batay ou avè m'.

Job 33:6 (HCB)
Ou menm avè m', devan Bondye nou tout se menm. Nou tou de, se ak labou li fè nou.

Job 33:7 (HCB)
Ou wè! Ou pa bezwen pè m'! Mwen pa ka fè ou anyen!

Job 33:8 (HCB)
Mwen te tande ou ak de zòrèy mwen. Ki jan ou fè ka di:

Job 33:9 (HCB)
Mwen menm, mwen inonsan. M' pa fè ankenn peche! M' pa gen anyen sou konsyans mwen.

Job 33:10 (HCB)
Men, se Bondye ki pretann mwen ba l' jwen pou l' atake m'. Se li menm k'ap aji avè m' tankou si mwen te lènmi l'.

Job 33:11 (HCB)
Li mete de pye m' nan sèp. L'ap veye tou sa m'ap fè.

Job 33:12 (HCB)
La, Jòb monchè, m'ap reponn ou: ou antò. Paske Bondye pa kanmarad moun.

Job 33:13 (HCB)
Poukisa w'ap chache Bondye kont konsa? Se paske li pa reponn lè w'ap plenyen nan pye l'?

Job 33:14 (HCB)
Bondye pale divès jan. Men, pesonn pa okipe sa l'ap di.

Job 33:15 (HCB)
Lè moun kouche nan kabann yo, lè yo fon nan dòmi lannwit, Bondye pale ak yo nan rèv, nan vizyon.

Job 33:16 (HCB)
Li fè yo konnen sa li gen pou l' di yo. Li ba yo avètisman pou yo mache sou piga yo.

Job 33:17 (HCB)
Li vle pou yo kite move chemen y'ap swiv la, pou yo pa kite lògèy vire tèt yo.

Job 33:18 (HCB)
Konsa, yo p'ap mouri. Y'a sove lavi yo.

Job 33:19 (HCB)
Bondye avèti moun tou lè li voye maladi sou yo. Li ba yo doulè nan tout kò yo.

Job 33:20 (HCB)
Li bay yo degoutans manje. Yo pèdi anvi manje menm lò manje a gou.

Job 33:21 (HCB)
Y'ap depafini, tout moun wè jan y'ap vin mèg. Tout zo nan kò yo griyen.

Job 33:22 (HCB)
Sa ki rete pou yo mouri a, pou y' ale nan peyi san chapo a pa anyen.

Job 33:23 (HCB)
Lè sa a, yon zanj Bondye ka vin bò kote l', yonn nan milyonven zanj Bondye yo ki la pou fè moun chonje devwa yo.

Job 33:24 (HCB)
Zanj lan va gen pitye pou li. L'a di Bondye: -Tanpri, pa kite l' mouri. M'ap peye pou sove lavi li.

Job 33:25 (HCB)
Kò li va refè, l'a vin fre tankou lè l' te jenn.

Job 33:26 (HCB)
Li lapriyè Bondye, Bondye reponn li. li al adore Bondye ak kè kontan. Bondye padonnen l' devan tout moun.

Job 33:27 (HCB)
L'ap mache bay Bondye lwanj toupatou. L'ap di: -Mwen te peche, mwen te fè sa ki mal. Men, Bondye pa fè m' peye pou sa m' te fè a.

Job 33:28 (HCB)
Li egzante m' lanmò. Li ban m' lavi ankò.

Job 33:29 (HCB)
Men tou sa Bondye ap fè, de fwa, twa fwa pou lèzòm,

Job 33:30 (HCB)
pou l' pa kite yo mouri, pou l' ba yo lavi ak kè kontan.

Job 33:31 (HCB)
Koulye a, Jòb, louvri zòrèy ou! Koute byen sa m'ap di! Pe bouch ou la! Kite m' fin pale!

Job 33:32 (HCB)
Men, si ou gen kichòy ou vle di, pale; m'ap koute ou. Paske mwen ta vle ba ou rezon.

Job 33:33 (HCB)
Osinon, pe bouch ou, koute m' pito! Kite m' moutre ou sa ki rele gen bon konprann.

Previous Chapter
« Job 32

Next Chapter
Job 34 »

Job (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42