Job 17 | HCB Bible Study

Job 17:1 (HCB)
Souf mwen prèt pou koupe. Mwen pa lwen mouri. Se pou simityè ase mwen bon.

Job 17:2 (HCB)
Kote m' vire, se moun k'ap pase m' nan betiz. Vye pawòl jouman yo enpoze m' dòmi.

Job 17:3 (HCB)
Ou mèt kwè m', Bondye! Se ou menm ankò ki pou bay garanti pou mwen. M' pa gen pesonn lòt ki ka tope ak yo.

Job 17:4 (HCB)
Ou fèmen lespri yo pou yo pa konprann. Pa kite yo gen rezon sou mwen.

Job 17:5 (HCB)
Pawòl la di: Yon moun ap fè gwo fèt pou zanmi l', epi pitit li yo ap mouri grangou anndan lakay li.

Job 17:6 (HCB)
Yo fè koze sou mwen nan pèp la. Yo vin krache nan figi m'!

Job 17:7 (HCB)
Mwen sitèlman nan lapenn, m' pa ka louvri je m'. Mwen fin tounen zo ak po. Ata lonbraj mwen pa fè!

Job 17:8 (HCB)
Moun k'ap mache dwat yo sezi lè yo wè sa. Inonsan yo fin debòde sou mechan an ki vire do bay Bondye.

Job 17:9 (HCB)
Moun k'ap mennen yon vi dwat, se yo ki gen rezon. Sa ki pa mete men yo nan ankenn move zafè kanpe pi rèd sou pozisyon yo.

Job 17:10 (HCB)
Nou tout mèt vin kanpe devan m', mwen p'ap jwenn yonn ladan nou ki gen bon konprann.

Job 17:11 (HCB)
Mwen fin viv! Tout plan m' te gen nan tèt mwen kraze. Mwen pa gen ankenn espwa ankò.

Job 17:12 (HCB)
Yo pretann lannwit se lajounen. Lè fènwa, yo di limyè a pa lwen.

Job 17:13 (HCB)
Se lanmò m'ap tann. Se al kouche nan simityè ki sèl espwa m'.

Job 17:14 (HCB)
Mwen di tonm lan ou se papa m'. Mwen di vèmen ki pral manje m' yo: nou se manman m' ak sè m'.

Job 17:15 (HCB)
Kote ki gen espwa pou mwen ankò? Ki moun ki wè yon bon lavi pou mwen ankò?

Job 17:16 (HCB)
Lè m'a mouri, lè m'a fin desann nan peyi kote mò yo ye a, èske m'a ka pote espwa m' yo ansanm avè m'?

Previous Chapter
« Job 16

Next Chapter
Job 18 »

Job (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42