Job 22 | HCB Bible Study

Job 22:1 (HCB)
Lè sa a, Elifaz, moun lavil Teman an, pran lapawòl. Li di konsa:

Job 22:2 (HCB)
Eske yon moun ka itil Bondye? Non! Ata moun ki gen bon konprann yo, se tèt yo ase yo itil.

Job 22:3 (HCB)
Lè ou fè sa ki byen, ki enterè Bondye ki gen tout pouvwa a jwenn nan sa? Sa sa rapòte l' lè ou mennen bak ou dwat?

Job 22:4 (HCB)
Eske se paske ou gen krentif pou Bondye kifè l'ap rale zòrèy ou konsa, kifè l'ap trennen ou nan tribinal li?

Job 22:5 (HCB)
Non. Se paske ou fè anpil peche. Se paske ou te san limit nan fè mechanste.

Job 22:6 (HCB)
Ou fè frè ou ba ou garanti pou lajan li pa t' dwe ou. Ou pran ata rad ki sou li, ou kite l' toutouni.

Job 22:7 (HCB)
Ou refize bay moun ki te swaf yo ti gout dlo. Ou refize bay moun ki te grangou yo moso pen.

Job 22:8 (HCB)
Ou pwofite fòs ou ak pozisyon ou pou pran tout peyi a pou ou.

Job 22:9 (HCB)
Ou refize lonje men ou bay vèv yo. Ou maltrete timoun ki san papa yo.

Job 22:10 (HCB)
Se poutèt sa, kote ou rive se pèlen yo pare pou ou. Ou rete konsa, kè ou kase.

Job 22:11 (HCB)
Sitèlman fè nwa, ou pa ka wè. Ou nan dlo jouk nan kou!

Job 22:12 (HCB)
Eske se pa anwo nèt nan syèl la Bondye rete? Se anba pou li voye je l' pou l' ka wè zetwal yo.

Job 22:13 (HCB)
Ou konn sa, epi w'ap di: Sa Bondye ka konnen? Li kache dèyè nwaj yo, ki jan pou l' jije sa k'ap pase sou latè?

Job 22:14 (HCB)
Nwaj yo twò pwès, li pa ka wè. Se sou fetay syèl la l'ap mache.

Job 22:15 (HCB)
Ou vle mache pye pou pye dèyè mechan yo, nan move chemen yo te toujou pran depi lontan an!

Job 22:16 (HCB)
Yo mouri anvan lè yo tou. Yo tankou lavalas: anvan ou bat je ou, yo pase.

Job 22:17 (HCB)
Yo menm tou yo t'ap di Bondye: Wete kò ou sou nou! Kisa Bondye ki gen tout pouvwa a ka fè nou?

Job 22:18 (HCB)
Atò, se Bondye menm ki te plen kay yo ak richès. Mwen pa janm konprann ki jan mechan yo ka fè di sa.

Job 22:19 (HCB)
Men, lè y'ap pini mechan yo, moun ki mache dwat yo va kontan, inonsan yo va pase yo nan rizib.

Job 22:20 (HCB)
Gade jan grannèg yo fini non! Dife boule tou sa yo te genyen.

Job 22:21 (HCB)
Jòb monchè, byen ak Bondye ankò, tande! Sispann chache l' kont!

Job 22:22 (HCB)
Koute pawòl li t'ap di ou yo. Kenbe yo nan kè ou.

Job 22:23 (HCB)
Wi, tounen vin jwenn li, san lògèy nan kè ou. Sispann fè sa ki mal lakay ou.

Job 22:24 (HCB)
Voye tout lò ou jete nan fatra. Pi bon pyès lò ou yo, jete yo nan galèt larivyè.

Job 22:25 (HCB)
Se Bondye ki gen tout pouvwa a ki va tout lò ou. Se li menm ki va gwo pil lajan byen wo pou ou.

Job 22:26 (HCB)
Paske, lè sa a, se nan Bondye ki gen tout pouvwa a w'a jwenn tout plezi ou. Se sou Bondye w'a toujou gade.

Job 22:27 (HCB)
Lè w'a lapriyè nan pye l', l'a reponn ou. W'a kenbe tout pwomès ou fè l' yo.

Job 22:28 (HCB)
Tout zafè ou va mache byen. Limyè va klere byen bèl sou tout wout ou.

Job 22:29 (HCB)
Bondye kraze lògèy moun awogan. Men, li sove moun ki bese tèt devan li.

Job 22:30 (HCB)
L'ap delivre ou si ou inonsan. L'a sove ou, si ou pa janm sal men ou nan anyen.

Previous Chapter
« Job 21

Next Chapter
Job 23 »

Job (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42