Job 26:1 (HCB)
Jòb pran lapawòl ankò, li di l' konsa:

Job 26:2 (HCB)
Ou gen tan konn konsole moun ki nan lafliksyon! Ou gen tan konn lonje men bay moun ki san fòs!

Job 26:3 (HCB)
Ala bon konsèy ou bay moun ki san konprann lan! Ou gen tan gen anpil konesans nan ou!

Job 26:4 (HCB)
Men, pou ki moun tout bèl diskou sa yo? Ki moun ki mete pawòl sa yo nan bouch ou?

Job 26:5 (HCB)
Bildad pran lapawòl ankò li di: -Nanm moun mouri k'ap viv nan fon lanmè a ap tranble anba tè a.

Job 26:6 (HCB)
Peyi kote mò yo ye a louvri aklè devan je Bondye. Pa gen anyen ki pou anpeche Bondye wè sa k'ap pase ladan l'.

Job 26:7 (HCB)
Se li menm ki louvri syèl ki sou bò nò a anlè, san anyen pou soutni l'. Li pandye tè a ankò san anyen pou kenbe l'.

Job 26:8 (HCB)
Se li menm ki plen nwaj yo dlo. Se li menm ki pa kite pèz dlo a pete nwaj yo.

Job 26:9 (HCB)
Se li menm ki kache lalin plenn lan dèyè yon nwaj.

Job 26:10 (HCB)
Se li menm ki trase yon wonn sou lanmè a, li separe limyè ak fènwa.

Job 26:11 (HCB)
Lè li bay poto ki soutni syèl la yon prigad, yo sezi, yo pran tranble sitèlman yo pè.

Job 26:12 (HCB)
Avèk fòs ponyèt li, li fè lanmè a vin dou devan li. Avèk ladrès li, li kraze Raab, gwo bèt lèd la.

Job 26:13 (HCB)
Avèk souf li, li fè syèl la vin klè. Avèk men li, li touye gwo koulèv ki t'ap kouri chape a.

Job 26:14 (HCB)
Sa se yon ti kal nan tou sa li fè. Se sa ase ki resi rive nan zòrèy nou! Men, ki moun ki ka konnen tou sa Bondye fè?
Previous Chapter
« Job 25
Next Chapter
Job 27 »

Job (HCB) Chapter Selection

HCB Book Selection List

View full list of HCB Bible Books and Chapters