Lik 20:1 (HCB)
Yon jou konsa, Jezi te nan tanp lan; li t'ap moutre pèp la anpil bagay; li t'ap anonse yo bon nouvèl la. Chèf prèt yo, dirèktè lalwa yo ak chèf fanmi yo vin rive.

Lik 20:2 (HCB)
Yo di li: Manyè di nou ki dwa ou genyen pou w'ap fè tout bagay sa yo? Wi, kilès ki ba ou otorite pou fè yo?

Lik 20:3 (HCB)
Jezi reponn yo: Mwen pral poze nou yon keksyon, mwen menm tou.

Lik 20:4 (HCB)
Di mwen kilès ki te voye Jan Batis batize moun: Bondye osinon lèzòm?

Lik 20:5 (HCB)
Men, yonn t'ap di lòt: Si nou reponn se Bondye ki voye l', la mande nou poukisa nou pa t' kwè li.

Lik 20:6 (HCB)
Si nou reponn se lèzòm ki voye l', tout pèp la va touye nou ak kout wòch, paske yo tout te gen konviksyon Jan Batis te yon pwofèt.

Lik 20:7 (HCB)
Lè sa a yo reponn li: Nou pa konn ki moun ki te voye l' batize.

Lik 20:8 (HCB)
Jezi di yo: Enben, mwen menm tou, mwen p'ap di nou avèk ki otorite m'ap fè bagay sa yo.

Lik 20:9 (HCB)
Apre sa, Jezi pran rakonte pèp la parabòl sa a: Vwala, se te yon nonm ki te plante yon jaden rezen. Li antann li avèk kèk moun pou okipe jaden an pou li. Apre sa, li kite peyi a, li al fè lontan deyò.

Lik 20:10 (HCB)
Lè sezon rekòt la rive, li voye yon domestik kote moun ki t'ap pran swen jaden an pou li. Li te voye chache pòsyon pa l' nan rekòt rezen an nan men yo. Men, kiltivatè yo bat domestik la byen bat, epi yo voye l' tounen bay mèt jaden an san yo pa ba l' anyen.

Lik 20:11 (HCB)
Mèt jaden an voye yon lòt domestik kote yo ankò. Men, yo bat li byen bat, yo joure l' byen joure, epi yo voye l' tounen san yo pa ba l' anyen.

Lik 20:12 (HCB)
Mèt jaden an voye yon twazyèm domestik. Fwa sa a, yo blese l', yo mete l' deyò.

Lik 20:13 (HCB)
Lè sa a, mèt jaden an di: Kisa pou m' fè? Bon, mwen pral voye pitit gason mwen renmen anpil la. Omwens y'a gen respè pou li.

Lik 20:14 (HCB)
Men, lè kiltivatè yo wè pitit mèt jaden an, yonn di lòt: Men eritye a! Ann touye l', konsa jaden an va rete pou nou.

Lik 20:15 (HCB)
Yo jete l' deyò jaden an, yo touye li. Atò, kisa mèt jaden an pral fè yo?

Lik 20:16 (HCB)
L'ap vini, l'ap fè touye tout kiltivatè yo, epi l'ap bay lòt moun jaden rezen an. Lè pèp la tande sa, yo di: Mande Bondye padon!

Lik 20:17 (HCB)
Men, Jezi gade yo, li mande yo: Ki sans nou bay pawòl sa ki ekri a: Wòch moun ki t'ap bati yo te voye jete a, se li menm ki tounen wòch ki kenbe kay la.

Lik 20:18 (HCB)
Tout moun ki bite sou wòch sa a gen pou kase ren yo. Men, si se wòch la menm ki tonbe sou yon moun, li gen pou l' kraze moun lan an miyèt moso.

Lik 20:19 (HCB)
Menm lè a, chèf prèt yo ak dirèktè lalwa yo t'ap chache mete men sou li, paske yo te byen konnen se pou yo Jezi te bay parabòl sa a. Men, yo te pè pèp la.

Lik 20:20 (HCB)
Yo pran veye Jezi. Yo voye espyon dèyè li. Espyon yo pran pòz moun debyen yo, pou wè si yo te ka pran yon pawòl nan bouch li pou akize li. Konsa, yo ta kapab lage l' nan men gouvènè a ki te gen pouvwa ak tout otorite.

Lik 20:21 (HCB)
Espyon yo poze l' keksyon sa a: Mèt, nou konnen ou se moun serye. Tou sa ou di ak tou sa ou moutre nou se verite. Ou pa gade sou figi moun, men ou moutre chemen Bondye a jan li ye a.

Lik 20:22 (HCB)
Manyè di nou: Eske lalwa nou an pèmèt nou peye Seza lajan kontribisyon an, wi ou non?

Lik 20:23 (HCB)
Men, Jezi wè se nan pèlen yo te vle pran li. Li di yo:

Lik 20:24 (HCB)
Moutre m' yon pyès lajan. Pòtre ki moun ak non ki moun ki sou pyès lajan an? Yo reponn li: Se pòtre Seza ak non Seza.

Lik 20:25 (HCB)
Lè sa a li di yo: Enben, bay Seza sak pou Seza, bay Bondye sak pou Bondye.

Lik 20:26 (HCB)
Yo pa t' kapab jwenn anyen ki mal nan sa l' t'ap di devan pèp la. Okontrè, pawòl sa a te fè yo pi sezi ankò. Yo fèmen bouch yo san di yon mo.

Lik 20:27 (HCB)
Sadiseyen yo se yon gwoup jwif ki di moun mouri pa leve ankò. Gen kèk ladan yo ki vin bò kot Jezi ak yon keksyon. Yo di l' konsa:

Lik 20:28 (HCB)
Mèt, Moyiz te ekri lòd sa a ban nou: Lè yon nonm marye mouri san kite pitit, si l' gen yon frè, frè a gen pou l' marye avèk madanm defen an pou l' sa fè pitit pou frè l' ki mouri a.

Lik 20:29 (HCB)
Se konsa, te gen sèt frè. Premye a marye, li mouri san l' pa kite pitit.

Lik 20:30 (HCB)
Dezyèm lan marye ak vèv la. Apre sa, twazyèm lan marye avè l' tou.

Lik 20:31 (HCB)
Konsa konsa, sèt frè yo marye ak fanm lan yonn apre lòt, epi yo tout yo mouri san kite pitit.

Lik 20:32 (HCB)
Apre yo tout fin mouri, fanm lan mouri poutèt pa l' tou.

Lik 20:33 (HCB)
Lè mò yo va gen pou yo leve, fanm sa a ki te madanm tout sèt frè yo, madanm kilès nan yo li pral ye la a menm?

Lik 20:34 (HCB)
Jezi reponn yo: Isit sou latè, fanm ak gason nan marye.

Lik 20:35 (HCB)
Men, fanm ak gason ki merite pou yo leve soti vivan nan lanmò pou yo ka patisipe nan lavi k'ap vini an, moun sa yo pa nan marye ankò.

Lik 20:36 (HCB)
Yo pa ka mouri ankò, se tankou zanj Bondye yo ye, yo se pitit Bondye, paske yo leve soti vivan nan lanmò.

Lik 20:37 (HCB)
Wi, moun mouri gen pou yo leve. Se Moyiz menm ki moutre nou sa, lè bò ti touf bwa a, li te rele Bondye: Bondye Abraram, Bondye Izarak, Bondye Jakòb.

Lik 20:38 (HCB)
Bondye se Bondye moun vivan li ye, li pa Bondye moun mouri, paske pou li tout moun vivan.

Lik 20:39 (HCB)
Lè sa a, kèk dirèktè lalwa pran lapawòl, yo di: Mèt, ou byen pale.

Lik 20:40 (HCB)
Apre sa, yo pa t' gen odas poze l' ankenn lòt keksyon.

Lik 20:41 (HCB)
Jezi di yo: Ki jan yo fè di Kris la se pitit pitit David li ye?

Lik 20:42 (HCB)
Men, sa David menm te di nan liv Sòm yo: Bondye Mèt la te di Seyè mwen an: Chita la sou bò dwat mwen,

Lik 20:43 (HCB)
jouk tan mwen fè lènmi yo tounen yon ti ban pou lonje pye ou.

Lik 20:44 (HCB)
Si David rele Kris la Seyè, ki jan pou Kris la ta ka pitit pitit li?

Lik 20:45 (HCB)
Lè sa a, tout pèp la t'ap koute Jezi. Li di disip li yo:

Lik 20:46 (HCB)
Pran prekosyon nou avèk dirèktè lalwa yo. Yo renmen pwonmennen avèk rad long yo; yo renmen moun bese tèt yo jouk atè pou di yo bonjou sou plas piblik; lè y' al nan sinagòg, yo toujou ap chache pou yo chita kote pou tout moun ka wè yo; nan resepsyon yo chache pi bon plas la.

Lik 20:47 (HCB)
Se piye y'ap piye pòv vèv yo, anmenmtan y'ap plede fè lapriyè byen long pou parèt pi bon. Chatiman moun sa yo pral pi rèd.