Lik 18:1 (HCB)
Jezi rakonte yo parabòl sa a pou l' te moutre yo nesesite pou yo toujou lapriyè san yo pa janm dekouraje:

Lik 18:2 (HCB)
Vwala, se te yon jij ki te rete nan yon lavil; li pa t' pè Bondye ni li pa t' respekte pesonn.

Lik 18:3 (HCB)
Nan menm lavil sa a, te gen yon vèv ki te konn vin bò kot jij la. Vèv la te toujou ap di li: Rann mwen jistis kont moun ki nan kont avè m' lan non.

Lik 18:4 (HCB)
Pandan lontan jij la te refize fè sa pou li. Men, yon lè li di nan kè l': Se vre, mwen pa pè Bondye, ni mwen pa rete ak moun.

Lik 18:5 (HCB)
Men, fanm sa a ap plede nwi mwen. M'ap rann li jistis, konsa la sispann anbete mwen.

Lik 18:6 (HCB)
Jezi di: Nou tande sa move jij la di!

Lik 18:7 (HCB)
Bon! Eske Bondye pa ta regle zafè pitit li yo, moun li menm li chwazi yo, lè y'ap rele nan pye l' lajounen kou lannwit? Eske l'ap pran anpil tan pou l' ede yo?

Lik 18:8 (HCB)
M'ap di nou sa: L'ap regle zafè yo vit vit. Men, lè Moun Bondye voye nan lachè a va vini, èske la jwenn moun ki gen konfyans nan Bondye ankò sou latè?

Lik 18:9 (HCB)
Jezi di parabòl sa a pou moun ki te kwè yo bon devan Bondye epi ki t'ap meprize lòt moun:

Lik 18:10 (HCB)
Dezòm moute nan tanp lan al lapriyè. Yonn te yon farizyen, lòt la yon pèseptè kontribisyon.

Lik 18:11 (HCB)
Farizyen an te kanpe apa, li t'ap lapriyè konsa: Bondye, m'ap di ou mèsi dapre mwen pa vòlò, ni visye, ni adiltè tankou lòt yo; mèsi dapre mwen pa tankou pèseptè kontribisyon sa a.

Lik 18:12 (HCB)
Chak senmenn mwen pase de jou ap fè jèn, mwen bay ladim nan tou sa mwen genyen.

Lik 18:13 (HCB)
Pèseptè kontribisyon an menm te rete dèyè, li pa t' menm gen kouraj leve je l' nan syèl; li t'ap bat lestonmak li, li t'ap di: Bondye, gen pitye pou mwen ki fè anpil peche.

Lik 18:14 (HCB)
Lè sa a, Jezi di yo: M'ap di nou sa, se pa farizyen an non, men se pèseptè kontribisyon an ki tounen lakay li ak padon Bondye. Paske, yon moun ki vle leve tèt li, y'a desann li, yon moun ki desann tèt li, y'a leve li.

Lik 18:15 (HCB)
Yo te mennen ata tibebe bay Jezi pou l' te mete men sou tèt yo. Lè disip yo wè sa, yo t'ap di moun yo pa fè sa.

Lik 18:16 (HCB)
Men, Jezi rele timoun yo vin jwenn li, li di: Kite timoun yo vin jwenn mwen. Pa anpeche yo vini, paske peyi kote Bondye Wa a, se pou tout moun ki tankou timoun sa yo li ye.

Lik 18:17 (HCB)
Sa m'ap di nou la a, se vre wi: si yon moun pa asepte otorite Bondye a tankou yon timoun, li p'ap janm mete pye l' nan peyi kote Bondye Wa a.

Lik 18:18 (HCB)
Yonn nan chèf jwif yo mande Jezi: Bon Mèt, kisa pou m' fè pou m' resevwa lavi ki p'ap janm fini an?

Lik 18:19 (HCB)
Jezi di li: Poukisa ou rele m' bon? Se yon sèl bon ki genyen, se Bondye.

Lik 18:20 (HCB)
Ou konn kòmandman yo: Piga ou fè adiltè, piga ou touye moun, piga ou vòlò, piga ou fè manti sou moun, respekte papa ou ak manman ou.

Lik 18:21 (HCB)
Nonm lan reponn: Mwen swiv tout bagay sa yo depi m' te tikatkat.

Lik 18:22 (HCB)
Lè Jezi tande sa, li di l': Ou manke yon bagay toujou: vann tou sa ou genyen, separe lajan an bay pòv. Apre sa, wa gen yon richès nan syèl la. Epi vin swiv mwen.

Lik 18:23 (HCB)
Men, pawòl sa a te fè nonm lan lapenn anpil paske li te gen anpil byen.

Lik 18:24 (HCB)
Jezi wè jan sa te fè nonm lan lapenn, li di konsa: Sa ap difisil nèt pou moun rich antre nan peyi kote Bondye Wa a.

Lik 18:25 (HCB)
L'ap pi fasil pou gwo bèt yo rele chamo a pase nan je yon zegwi pase pou yon rich antre nan peyi kote Bondye Wa a.

Lik 18:26 (HCB)
Moun ki t'ap koute l' yo di l': Nan kondisyon sa a, ki moun ki ka sove?

Lik 18:27 (HCB)
Jezi reponn yo: Sa lèzòm pa ka fè, Bondye ka fè li.

Lik 18:28 (HCB)
Lè sa a, Pyè di l': Tande, men nou kite tou sa nou te genyen pou nou swiv ou.

Lik 18:29 (HCB)
Jezi di yo: Sa m'ap di nou la a, se vre wi: Nenpòt moun ki kite kay li, osinon madanm li, osinon frè l', osinon papa l' ak manman l', osinon pitit li poutèt peyi kote Bondye Wa a,

Lik 18:30 (HCB)
moun sa a gen pou l' resevwa plis pase sa depi nan tan sa a, epi nan tan k'ap vini apre sa a li gen pou l' resevwa lavi ki p'ap janm fini an.

Lik 18:31 (HCB)
Jezi pran douz disip yo apa, li di yo: Tande, men n'ap moute Jerizalèm kote tou sa pwofèt yo te ekri sou Moun Bondye voye nan lachè a pral rive.

Lik 18:32 (HCB)
Yo pral lage l' nan men moun lòt nasyon yo, y'a pase l' nan rizib, y'a joure l', y'a krache sou li.

Lik 18:33 (HCB)
Apre sa, y'a bat li byen bat, y'a touye l'; men sou twa jou la leve soti vivan nan lanmò.

Lik 18:34 (HCB)
Men, disip yo pa t' konprann anyen nan sa; sans pawòl la te kache pou yo, yo pa t' kapab konnen sa Jezi t'ap di yo konsa.

Lik 18:35 (HCB)
Lè sa a, Jezi te prèt pou antre Jeriko; te gen yon nonm avèg chita bò chemen an ki t'ap mande charite.

Lik 18:36 (HCB)
Lè l' tande foul moun yo ap pase, li mande sak genyen.

Lik 18:37 (HCB)
Yo di li: Se Jezi, moun Nazarèt la, k'ap pase.

Lik 18:38 (HCB)
Li pran rele: Jezi, pitit David la, pitye pou mwen.

Lik 18:39 (HCB)
Moun ki t'ap mache devan yo t'ap kouri dèyè l' pou te fè l' pe bouch li. Men, li t'ap rele pi rèd: Pitit David la, pitye pou mwen.

Lik 18:40 (HCB)
Jezi rete, li bay lòd pou yo mennen l' ba li. Lè avèg la pwoche, Jezi mande li:

Lik 18:41 (HCB)
Kisa ou vle m' fè pou ou? Li reponn: Mèt, fè m' wè ankò.

Lik 18:42 (HCB)
Epi Jezi di li: Wè non. Se konfyans ou nan Bondye ki geri ou.

Lik 18:43 (HCB)
Menm lè a, avèg la wè. Apre sa, li t'ap swiv Jezi. Li t'ap fè lwanj Bondye. Lè pèp la wè sa, yo tout pran fè lwanj Bondye tou.