Lik 19 | HCB Bible Study

Lik 19:1 (HCB)
Jezi antre Jeriko, li t'ap travèse lavil la.

Lik 19:2 (HCB)
Te gen yon nonm nan lavil la yo rele Zache. Li te chèf pèseptè kontribisyon yo, se te yon nonm rich.

Lik 19:3 (HCB)
Li t'ap chache wè ki moun Jezi ye. Men, li te yon nonm ti tay. Akòz foul moun yo, li pa t' kapab rive wè li.

Lik 19:4 (HCB)
Li pran kouri devan; li moute sou yon pye sikomò pou l' wè Jezi ki te gen pou l' te pase bò la.

Lik 19:5 (HCB)
Lè Jezi rive la, li leve je l' anlè, li di l': Zache, fè vit desann. Fòk mwen fè ladesant lakay ou jòdi a.

Lik 19:6 (HCB)
Zache prese desann, li resevwa Jezi ak kè kontan.

Lik 19:7 (HCB)
Lè yo wè sa, tout moun pran babye, yo t'ap di: Men nonm lan fè ladesant kay yon nonm ki plen peche.

Lik 19:8 (HCB)
Zache leve kanpe, li di Jezi konsa: Koute, Mèt. Mwen pral bay pòv mwatye tout byen mwen genyen. Si mwen te twonpe yon moun pou m' pran lajan l', mwen pral rann li kat fwa lavalè.

Lik 19:9 (HCB)
Jezi di li: Jòdi a, kay sa a delivre paske nonm sa a se yon pitit Abraram li ye tou.

Lik 19:10 (HCB)
Moun Bondye voye nan lachè a vin chache sa ki te pèdi pou l' delivre yo.

Lik 19:11 (HCB)
Apre sa, Jezi rakonte yon parabòl pou moun ki te fèk tande pawòl sa yo. Paske li te toupre lavil Jerizalèm lan, yo te kwè gouvènman Bondye ki Wa a tapral parèt touswit.

Lik 19:12 (HCB)
Men sa l' di yo: Vwala, se te yon nonm gran fanmi ki te al nan yon peyi byen lwen. Li te al fè yo ba l' otorite pou l' wa, apre sa pou l' te tounen lakay li ankò.

Lik 19:13 (HCB)
Anvan li ale, li rele dis nan domestik li yo, li ba yo chak yon pyès lò, li di yo: Fè lajan an travay jouk mwen tounen.

Lik 19:14 (HCB)
Men, pwòp moun peyi l' yo te rayi li. Yo voye kèk mesaje dèyè l' pou di: Nou pa vle nonm sa a pou wa nou.

Lik 19:15 (HCB)
Malgre sa, yo bay nonm lan otorite pou l' wa, epi l' tounen nan peyi li. Lè sa a, li fè rele domestik li te bay lajan yo pou yo vin kote l': li te bezwen konnen ki benefis yo chak te fè.

Lik 19:16 (HCB)
Premye a vini, li di: Monwa, pyès lò ou te ban mwen an rapòte dis pyès ankò.

Lik 19:17 (HCB)
Wa a di l': Sa se bèl bagay. Ou se yon bon domestik. M'ap mete ou gouvènen dis vil, paske ou te fè ti travay sa a byen.

Lik 19:18 (HCB)
Dezyèm lan vini, li di: Monwa, pyès lò ou te ban mwen an rapòte senk lòt pyès.

Lik 19:19 (HCB)
Wa a di l': Ou menm, m'ap mete ou gouvènen senk vil.

Lik 19:20 (HCB)
Yon lòt vini, li di: Monwa, men pyès lò ou la. Mwen te sere l' nan yon mouchwa.

Lik 19:21 (HCB)
Mwen te pè ou, paske ou se yon nonm ki di: ou pran sa ki pa pou ou, ou rekòlte sa ou pa simen.

Lik 19:22 (HCB)
Wa a reponn: Gade jan ou se yon move domestik! M'ap jije ou ak pawòl ki sot nan bouch ou. Ou te konnen m' se yon nonm ki di, mwen pran sa ki pa pou mwen, mwen rekòlte sa m' pa simen,

Lik 19:23 (HCB)
poukisa ou pa t' mete lajan m' labank; lè m' ta tounen, mwen ta wete l' ak yon enterè.

Lik 19:24 (HCB)
Li di moun ki te la yo: Wete lajan an nan men li. Bay nonm ki gen dis pyès yo li.

Lik 19:25 (HCB)
Yo di l': Men, monwa, li gen dis pyès deja.

Lik 19:26 (HCB)
Mwen di nou: Moun ki genyen deja a, y'a ba li ankò; men moun ki pa gen anyen menm lan, y'a wete nan men l' menm ti sa l' te genyen an.

Lik 19:27 (HCB)
Kanta lènmi m' yo ki pa t' vle mwen pou wa yo, mennen yo isit, touye yo la devan je mwen.

Lik 19:28 (HCB)
Apre Jezi fin pale konsa, li pran mache devan yo pou li al Jerizalèm.

Lik 19:29 (HCB)
Lè Jezi rive toupre Betfaje ak Betani, bò ti mòn Oliv la, li pran de nan disip li yo, li voye yo devan,

Lik 19:30 (HCB)
li di yo konsa: Ale nan bouk ki devan nou an. Lè n'a rive, n'a jwenn yon jenn ti bourik mare; pesonn pa kò janm moute sou li. Lage l', mennen l' ban mwen.

Lik 19:31 (HCB)
Nenpòt moun ki mande nou: Poukisa n'ap lage l'? N'a reponn: Se Mèt la ki bezwen li.

Lik 19:32 (HCB)
De disip yo ale; yo jwenn tout bagay jan Jezi te di yo a.

Lik 19:33 (HCB)
Pandan y'ap lage ti bourik la, mèt li di yo: Poukisa n'ap lage ti bourik la?

Lik 19:34 (HCB)
Yo reponn: Se Mèt la ki bezwen li.

Lik 19:35 (HCB)
Apre sa, yo mennen ti bourik la bay Jezi. Yo mete rad yo sou do ti bourik la, yo fè Jezi moute sou li.

Lik 19:36 (HCB)
Pandan Jezi t'ap vanse sou bourik la, moun yo tann rad yo atè sou tout chemen an.

Lik 19:37 (HCB)
Lè l' rive toupre Jerizalèm, nan ladesant mòn Oliv la, yon sèl kontantman pran tout foul moun ki t'ap swiv li yo; yo pran fè lwanj Bondye byen fò pou tout mirak yo te wè.

Lik 19:38 (HCB)
Yo t'ap di: benediksyon pou Wa ki vini nan non Mèt la! Kè poze pou tout moun nan syèl la! Lwanj pou Bondye!

Lik 19:39 (HCB)
Te gen kèk farizyen nan mitan foul la. Yo di Jezi konsa: Mèt, manyè fè disip ou yo pe bouch yo non.

Lik 19:40 (HCB)
Jezi reponn: M'ap di nou sa: si yo pe bouch yo, wòch yo va pran rele.

Lik 19:41 (HCB)
Lè Jezi rive toupre lavil la, li wè l', li pran kriye sou li,

Lik 19:42 (HCB)
li di: Si sèlman, jòdi a ou te kapab konprann, ou menm tou, bagay ki pou fè kè ou poze? Men, koulye a, yo kache; ou pa kapab wè yo!

Lik 19:43 (HCB)
Gen yon tan k'ap vin sou ou: lè sa a, lènmi ou yo va sènen ou toupatou, y'a fèmen ou nèt, y'a kwense ou sou tout bò.

Lik 19:44 (HCB)
Y'a detwi ou nèt ansanm ak tout moun ki nan mitan ou yo. Yo p'ap kite yon wòch kanpe sou yon lòt, paske ou pa t' rekonèt jou Bondye te vin pote ou sekou a.

Lik 19:45 (HCB)
Jezi antre nan tanp lan, li pran chase tout moun ki t'ap vann yo.

Lik 19:46 (HCB)
Li di yo: Men sa ki ekri: Se pou kay mwen an yon kay kote moun vin lapriyè nan pye m'; men, nou menm, nou fè l' tounen kachèt vòlè.

Lik 19:47 (HCB)
Chak jou, Jezi te nan tanp lan, li t'ap moutre moun yo anpil bagay. Chèf prèt yo, dirèktè lalwa yo ak chèf pèp la t'ap chache ki jan pou yo touye li.

Lik 19:48 (HCB)
Men, yo pa t' kapab jwenn yon jan pou yo te fè sa, paske tout pèp la t'ap koute sa l' t'ap di san yo pa pèdi yon mo.

Lik 19 HCB

Lik (HCB) Chapter Selection

HCB Book Selection List