1 Istwa 23:1 (HCB)
David te fin vye granmoun, li te fin viv kont li, lè li mete Salomon, pitit li a, wa sou pèp Izrayèl la.

1 Istwa 23:2 (HCB)
Li reyini tout chèf pèp Izrayèl yo, tout prèt yo ak tout moun Levi yo.

1 Istwa 23:3 (HCB)
Li fè konte tout moun Levi yo, depi sa ki gen trantan pou pi piti rive sou sa ki pi gran yo. Antou yo jwenn trantwimil (38.000) gason.

1 Istwa 23:4 (HCB)
David mete vennkatmil (24.000) pou dirije travay tanp lan, simil (6000) pou ekri tou sa k'ap pase ak pou rann jistis,

1 Istwa 23:5 (HCB)
katmil (4000) pou fè pòs nan pòtay la ak katmil (4000) pou fè lwanj Seyè a ak enstriman mizik David te fè fè pou sa.

1 Istwa 23:6 (HCB)
David separe moun Levi yo fè twa gwoup dapre branch fanmi pitit gason Levi yo: Gèchon, Keyat ak Merari.

1 Istwa 23:7 (HCB)
Gèchon te gen de pitit gason: Layedan ak Chimèyi.

1 Istwa 23:8 (HCB)
Layedan te fè twa pitit gason: Yekiyèl, pi gran an, Zetam ak Joèl.

1 Istwa 23:9 (HCB)
Chimeyi te fè twa pitit gason tou: Chelomit, Aziyèl ak Aran. Se yo ki te chèf fanmi moun Layedan yo.

1 Istwa 23:10 (HCB)
Chimeyi te gen kat lòt pitit gason: Jaka, Ziza, Jeouch ak Berya.

1 Istwa 23:11 (HCB)
Se Jaka ki te pi gran, Ziza te dezyèm pitit la. Jeouch ak Berya pa t' gen anpil pitit. Se konsa yo mete yo ansanm, yo pase pou yon sèl branch fanmi.

1 Istwa 23:12 (HCB)
Keyat te gen kat pitit: Amram, Jizeya, Ebwon ak Ouzyèl.

1 Istwa 23:13 (HCB)
Amram te gen de pitit gason: Arawon ak Moyiz. Bondye te mete Arawon ak pitit li yo apa pou yo okipe pyès ki apa nèt pou Bondye a, pou boule lansan devan Seyè a, pou yo sèvi l', pou yo beni pèp la nan non li. Se te travay pa yo sa pou tout tan.

1 Istwa 23:14 (HCB)
Moyiz te moun Bondye a menm. Pitit li yo te fè pati branch fanmi Levi a tou.

1 Istwa 23:15 (HCB)
Moyiz te gen de pitit gason: Gèchòm ak Elyezè.

1 Istwa 23:16 (HCB)
Premye pitit Gèchòm lan te rele Chebwèl.

1 Istwa 23:17 (HCB)
Elyezè li menm te gen Rekabya pou premye pitit. Li pa t' fè lòt pitit gason ankò. Men Rekabya te fè anpil pitit.

1 Istwa 23:18 (HCB)
Premye pitit Jizeya a te rele Chelomit.

1 Istwa 23:19 (HCB)
Men pitit Ebwon yo: Premye a te rele Jerija, dezyèm lan Amarya, twazyèm lan Jakazyèl, katriyèm lan Jekameam.

1 Istwa 23:20 (HCB)
Men pitit Ouzyèl yo: Miche, premye a ak Jikija, dezyèm lan.

1 Istwa 23:21 (HCB)
Merari te gen de pitit gason: Makli ak Mouchi. Makli te gen de pitit gason: Eleaza ak Kich.

1 Istwa 23:22 (HCB)
Eleaza mouri san kite pitit gason. Pitit fi ase li te genyen. Yo marye ak kouzen yo, pitit gason Kich yo.

1 Istwa 23:23 (HCB)
Mouchi te gen twa pitit gason: Makli, Edè ak Jerimòt.

1 Istwa 23:24 (HCB)
Se tout moun nan ras Levi yo sa, dapre fanmi yo, ki te gen non yo kouche nan rejis tankou chèf fanmi. Yo chak te gen travay pa yo nan sèvis kay Seyè a, depi sa ki gen ventan pou pi piti rive sou pi gran yo.

1 Istwa 23:25 (HCB)
David te di: -Seyè a, Bondye pèp Izrayèl la, te fè pèp li a viv ak kè poze. Li menm, Seyè a, l'ap toujou rete lavil Jerizalèm.

1 Istwa 23:26 (HCB)
Konsa, moun Levi yo p'ap nan pote Tant Randevou Seyè a ankò ansanm ak tout bagay yo bezwen pou fè sèvis pou li ankò.

1 Istwa 23:27 (HCB)
Se konsa, dapre dènye pawòl sa yo David te di lè sa a, yo enskri tout moun Levi yo, depi sa ki gen ventan pou pi piti rive sou pi gran yo.

1 Istwa 23:28 (HCB)
Travay yo se ede prèt yo, pitit Arawon yo, nan sèvis y'ap fè nan Tanp Seyè a. Se yo ki pou okipe lakou yo ak tout pyès nan Tanp lan. Se yo ki pou veye pou tout bagay rete nan kondisyon pou fè sèvis Bondye a. Se yo ki reskonsab tout lòt sèvis nan Tanp lan.

1 Istwa 23:29 (HCB)
Yo te reskonsab pen yo te ofri bay Bondye yo, farin frans yo sèvi pou fè ofrann yo, pen san ledven yo, ofrann farin melanje ak lwil yo. Se yo ki te reskonsab peze ak mezire ofrann nan Tanp lan.

1 Istwa 23:30 (HCB)
Lèfini, se pou yo la nan Tanp lan chak jou, nan maten ak nan aswè, pou di Bondye mèsi, pou fè lwanj pou li.

1 Istwa 23:31 (HCB)
Se pou yo la tou lè y'ap fè ofrann pou yo boule nèt pou Seyè a jou repo yo, premye jou chak mwa yo, ak pou lòt jou fèt yo. Te gen regleman ki te bay travay moun Levi yo gen pou fè ak kantite moun ki pou fè chak travay. Se te reskonsablite yo pou yo te toujou ap sèvi Seyè a.

1 Istwa 23:32 (HCB)
Se yo menm tou ki te reskonsab okipe Tant Randevou a, ak kote yo mete apa pou Seyè a, ak prèt yo, fanmi yo ki soti nan branch fanmi Arawon an, lè y'ap sèvi nan Tanp lan.