1 Istwa 11:1 (HCB)
Tout branch fanmi Izrayèl yo vin jwenn David lavil Ebwon, yo di l' konsa: -Nou se moun menm ras, menm fanmi avè ou.

1 Istwa 11:2 (HCB)
Depi lontan, menm sou rèy wa Sayil, se ou menm ki te kòmande lame pèp Izrayèl la kote l' ale. Lèfini ankò, Seyè a, Bondye ou la, te pwomèt se ou menm ki pral gouvènen pèp li a, pèp Izrayèl la. Se ou menm ki pral chèf yo.

1 Istwa 11:3 (HCB)
Se konsa, tout chèf fanmi pèp Izrayèl yo vin jwenn David lavil Ebwon. Yo pase yon kontra avè l' devan Seyè a. Yo fè seremoni, yo mete l' wa sou pèp Izrayèl la tou, jan Seyè a te fè pwomès la nan bouch pwofèt Samyèl.

1 Istwa 11:4 (HCB)
David mache sou lavil Jerizalèm ansanm ak tout moun pèp Izrayèl yo. Lè sa a, lavil la te rele Jebis. Se moun Jebis yo, premye moun ki te rete nan peyi a, ki t'ap viv la toujou.

1 Istwa 11:5 (HCB)
Moun Jebis yo te di David: Ou p'ap janm ka rive antre nan lavil nou an. Men David pran gwo fò ki te sou tèt mòn Siyon an. Se li yo rele lavil David la.

1 Istwa 11:6 (HCB)
David pou tèt pa l' te di premye moun ki va atake moun Jebis yo, l'ap mete l' chèf, moun sa a ap grannèg nan gouvènman l' lan. Joab, pitit gason Sewouya a, te premye moun ki atake. Se konsa li vin chèf.

1 Istwa 11:7 (HCB)
Apre sa, David al rete nan fò a. Se poutèt sa yo rele l' lavil David la.

1 Istwa 11:8 (HCB)
Lèfini, li bati lòt kay fè wonn fò a, depi sou teras la rive bò palè a. Joab menm rebati rès lavil la.

1 Istwa 11:9 (HCB)
Chak jou David t'ap vin pi fò. Seyè a, Bondye ki gen tout pouvwa a, te kanpe avè l'.

1 Istwa 11:10 (HCB)
Men non chèf vanyan sòlda David yo. Se yo ki te soutni gouvènman David la ansanm ak tout pèp Izrayèl la pou l' te ka wa, jan Seyè a te pwomèt moun Izrayèl yo sa.

1 Istwa 11:11 (HCB)
Pou konmanse, te gen Jakobeyam ki soti nan branch fanmi Akmoni an. Se li menm ki te chèf twa pi vanyan yo. Pou kont li, li batay ak twasan (300) moun ak frenn li ase. Li touye yo tout yon sèl kou.

1 Istwa 11:12 (HCB)
Dezyèm lan te rele Eleaza, pitit gason Dodo, pitit yon moun lavil Akwo. Se te yonn nan twa pi vanyan yo.

1 Istwa 11:13 (HCB)
Li te avèk David lè David t'ap goumen ak moun Filisti yo nan batay bò Pasdamen an. Li te nan yon jaden lòj lè sòlda pèp Izrayèl yo konmanse kouri devan moun Filisti yo.

1 Istwa 11:14 (HCB)
Se konsa, li menm ak sòlda li yo, yo tout rete kanpe nan mitan jaden lòj la, yo kenbe tèt ak moun Filisti yo, yo bat yo byen bat, yo kraze yo. Se konsa Seyè a te fè yo genyen batay la sou lènmi yo.

1 Istwa 11:15 (HCB)
Yon lòt jou, nan sezon rekòt, twa nan gwoup Trant yo al jwenn David nan gwòt Adoulam lan. Lame moun Filisti yo te moute kan yo nan plenn moun Refayim yo.

1 Istwa 11:16 (HCB)
Lè sa a, David te nan fò a. Yon gwoup moun Filisti te pran lavil Betleyèm.

1 Istwa 11:17 (HCB)
Yon sèl anvi pran David, li di konsa: -Ki moun ki va fè m' bwè ti gout dlo nan pi ki nan pòtay lavil Betleyèm lan?

1 Istwa 11:18 (HCB)
Lamenm twa mesye yo desann, yo fofile kò yo nan mitan moun Filisti yo, yo pran dlo nan pi ki te nan pòtay lavil Betleyèm lan, yo pote l' vin bay David. Men, David refize bwè dlo a. Li vide l' atè, li ofri l' bay Seyè a.

1 Istwa 11:19 (HCB)
Li di konsa: -Seyè, mwen pa gen dwa bwè dlo sa a. Se tankou si m' ta bwè san mesye sa yo ki riske lavi yo pou y' al chache l'. Se konsa, li derefize bwè dlo a. Se sa twa vanyan gason sa yo te fè.

1 Istwa 11:20 (HCB)
Abichayi, frè Joab, te chèf trant vanyan yo. Pou kont li, avèk yon frenn nan men l', li goumen ak twasan (300) moun, li touye yo. Se konsa, tout moun t'ap nonmen non l' nan gwoup Trant vanyan yo.

1 Istwa 11:21 (HCB)
Se li menm ki te resevwa plis lwanj nan Trant vanyan yo. Apre sa, li vin chèf yo. Men, li pa janm rive fè sa twa pi vanyan yo te fè.

1 Istwa 11:22 (HCB)
Benaja, pitit gason Jeojada a, moun lavil Kabseyèl, te pitit pitit yon vanyan sòlda. Li te fè anpil bagay ki fè wè li pa t' manke kouraj. Se li menm ki te touye de pitit Ariyèl yo, moun lavil Moab. Yon jou, lanèj t'ap tonbe, li desann nan yon sitèn dlo al touye yon lyon.

1 Istwa 11:23 (HCB)
Li touye tou yon moun peyi Lejip, yon gwo potorik gason sèt pye sis pous wotè, ki te gen yon gwo frenn nan men li. Frenn lan te gen yon manch menm gwosè ak yon gwo mach pilon. Benaja menm al atake li ak yon baton ase. Li wete lans lan nan men moun peyi Lejip la, epi li touye l' avè l'.

1 Istwa 11:24 (HCB)
Men sa Benaja, pitit gason Jeojada a, te fè. Se konsa, tout moun t'ap nonmen non l' nan gwoup Trant Vanyan yo.

1 Istwa 11:25 (HCB)
Se non li yo t'ap nonmen pi plis nan Trant Vanyan yo. Apre sa, li vin chèf yo. Men, li pa t' janm rive fè sa twa pi vanyan yo te fè. David te mete l' nan gad kò li.

1 Istwa 11:26 (HCB)
Men non lòt vanyan sòlda yo: Asayèl, frè Joab la, Elanan, pitit gason Dodo, moun lavil Betleyèm.

1 Istwa 11:27 (HCB)
Chamòt, moun lavil Awòd, Elèz, moun lavil Palon,

1 Istwa 11:28 (HCB)
Ira, pitit gason Ikèch, moun lavil Tekoa, Abyezè, moun lavil Anatòt,

1 Istwa 11:29 (HCB)
Sibekayi, moun lavil Oucha, Ilayi, moun lavil Awoya,

1 Istwa 11:30 (HCB)
Marayi, moun lavil Netofa, Elèb, pitit gason Bana, moun lavil Netofa,

1 Istwa 11:31 (HCB)
Itayi, pitit gason Ribayi, moun lavil Gibeya nan pòsyon tè ki pou branch fanmi Benjamen yo, Benaja, moun lavil Piraton,

1 Istwa 11:32 (HCB)
Ourayi, moun ravin Gach yo, Abiyèl, moun lavil Araba,

1 Istwa 11:33 (HCB)
Azmavèt, moun lavil Baawoum, Elyaba, moun lavil Chalbon,

1 Istwa 11:34 (HCB)
Pitit gason Achèm yo, moun lavil Gizon, Jonatan, pitit gason Chage, moun lavil Ara,

1 Istwa 11:35 (HCB)
Akiyam, pitit gason Saka, moun lavil Ara, Elifal, pitit gason Our,

1 Istwa 11:36 (HCB)
Efè, moun lavil Mekera, Akija, moun lavil Palon,

1 Istwa 11:37 (HCB)
Ezwo, moun lavil Kamèl, Narayi, pitit gason Esbayi,

1 Istwa 11:38 (HCB)
Joèl, frè Natan an, Mibka, pitit gason Agri,

1 Istwa 11:39 (HCB)
Zelèk, moun lavil Amon, Nakarayi, moun lavil Bewòt. Se li menm ki te pote zam Joab, pitit gason Sewouya a.

1 Istwa 11:40 (HCB)
Ira ak Garèb, nan fanmi Jetè a,

1 Istwa 11:41 (HCB)
Ouri, moun lavil Et la, Zabad, pitit Aklayi,

1 Istwa 11:42 (HCB)
Adina, pitit Siza, yon chèf nan branch fanmi Woubenn lan, ak yon gwoup trant moun avè l'.

1 Istwa 11:43 (HCB)
Anan, pitit gason Maka, Jozafa, moun lavil Mitni,

1 Istwa 11:44 (HCB)
Ouzya, moun lavil Astawòt, Sama ak Jeyèl, pitit gason Otam, moun lavil Awoyè.

1 Istwa 11:45 (HCB)
Jedyayèl ak Joa, frè li, tou de pitit gason Chimri, moun lavil Tiz.

1 Istwa 11:46 (HCB)
Eliyèl, moun lavil Manayim, Jeribayi ak Josavya, pitit gason Elnam, Jitma, moun lavil Moab,

1 Istwa 11:47 (HCB)
Eliyèl, Obèd ak Jasiyèl, moun lavil Soba.