1 Istwa 16:1 (HCB)
Yo pote Bwat Kontra Seyè a, yo mete l' nan plas li nan tant David te moute pou li a. Apre sa, yo ofri bèt pou boule nèt pou Bondye, ak ofrann pou di Bondye mèsi.

1 Istwa 16:2 (HCB)
Lè David fin fè ofrann sa yo, li beni pèp la nan non Seyè a.

1 Istwa 16:3 (HCB)
Li separe manje bay tout moun pèp Izrayèl yo, fanm kou gason. Li bay yo chak yon pen, yon moso vyann woti ak yon pen rezen.

1 Istwa 16:4 (HCB)
David chwazi kèk moun Levi pou reskonsab sèvis y'ap fè devan Bwat Kontra a pou Seyè a, Bondye pèp Izrayèl la, pou adore l', pou di l' mèsi, pou fè lwanj li.

1 Istwa 16:5 (HCB)
Li mete Asaf chèf ak Zakari pou vin apre li. Sou zòd yo te gen Aziyèl, Chemiramòt, Jekiyèl, Matitya, Eliyab, Benaja, Obèd-Edon, Jeyèl pou jwe enstriman mizik yo, gita ak bandjo. Asaf menm t'ap bat senbal ki fè gwo bri yo.

1 Istwa 16:6 (HCB)
Se Benaja ak Jaziyèl, prèt yo, ki te pou kònen twonpèt devan Bwat Kontra Bondye a tout tan.

1 Istwa 16:7 (HCB)
Se lè sa a, pou premye fwa, David te bay Asaf ak lòt moun Levi yo reskonsablite pou yo fè lwanj Seyè a.

1 Istwa 16:8 (HCB)
Lwanj pou Seyè a! Fè konnen jan li gen pouvwa! Fè nasyon yo konnen sa li fè!

1 Istwa 16:9 (HCB)
Chante pou li! Fè lwanj li! Rakonte tout bèl bagay li te fè yo.

1 Istwa 16:10 (HCB)
Fè kè nou kontan, paske nou se moun pa l'. Wi, se pou tout moun k'ap sèvi Seyè a fè fèt.

1 Istwa 16:11 (HCB)
Ale jwenn Seyè a pou l' ka ede nou. Toujou chache rete devan li.

1 Istwa 16:12 (HCB)
---

1 Istwa 16:13 (HCB)
Nou menm, pitit pitit Izrayèl, sèvitè Bondye a, Nou menm, pitit pitit Jakòb yo, nou menm Bondye chwazi yo, chonje mirak ak bèl bagay li te fè yo. Chonje jijman ki te soti nan bouch li.

1 Istwa 16:14 (HCB)
Seyè a, se Bondye nou li ye. Lè li pase yon lòd, se pou tout latè.

1 Istwa 16:15 (HCB)
Toujou chonje kontra li a. L'ap kenbe pwomès li pou tout tan tout tan.

1 Istwa 16:16 (HCB)
Se kontra li te fè ak Abraram lan, sèman li te fè bay Izarak la.

1 Istwa 16:17 (HCB)
Sa li te pwomèt Abraram lan, li fè l' tounen yon lwa pou pitit Jakòb yo, yon kontra ak pèp Izrayèl la pou tout tan.

1 Istwa 16:18 (HCB)
Li te di: M'ap ba ou peyi Kanaran an pou pòsyon pa ou nan byen m' yo.

1 Istwa 16:19 (HCB)
Lè sa a, pèp Bondye a pa t' anpil. Yo te sèlman yon ti ponyen moun. Yo te tankou etranje toujou nan peyi a.

1 Istwa 16:20 (HCB)
Yo t'ap mache ale vini nan tout nasyon yo. Yo t'ap soti nan yon peyi ale nan yon lòt.

1 Istwa 16:21 (HCB)
Men, li pa t' kite pesonn maltrete yo. Li te menm rive pini anpil wa poutèt yo.

1 Istwa 16:22 (HCB)
Li te di: Piga nou manyen moun mwen chwazi yo. Piga nou fè pwofèt mwen yo anyen.

1 Istwa 16:23 (HCB)
Nou tout ki rete sou latè, chante pou Seyè a! Chak jou, fè konnen jan li delivre nou.

1 Istwa 16:24 (HCB)
Fè nasyon yo konnen pouvwa li. Fè tout pèp yo konnen bèl bagay li fè yo.

1 Istwa 16:25 (HCB)
Seyè a gen gwo pouvwa. Li merite pou yo fè lwanj li vre. Se pou tout moun pè l' pi plis pase lòt bondye yo.

1 Istwa 16:26 (HCB)
Bondye lòt nasyon yo pa anyen, se pòtre yo ye. Men, se Seyè a ki fè syèl la.

1 Istwa 16:27 (HCB)
Devan li, se respè, se chapo ba. Gen pouvwa, gen kè kontan kote l' ye lakay li a.

1 Istwa 16:28 (HCB)
Nou tout pèp ki sou latè, fè lwanj Seyè a! Fè lwanj Seyè a pou pouvwa ak fòs li genyen!

1 Istwa 16:29 (HCB)
Fè lwanj Seyè a, paske li merite sa! Pote ofrann ba li anndan lakay li! Adore Bondye nan bèl kay ki apa pou li a!

1 Istwa 16:30 (HCB)
Nou tout ki sou latè, tranble devan li. Latè kanpe fèm, anyen pa ka brannen l'.

1 Istwa 16:31 (HCB)
Se pou syèl la kontan, se pou latè a fè fèt. Mache di nan tout peyi yo: Se Seyè a ki sèl wa.

1 Istwa 16:32 (HCB)
Se pou lanmè a ansanm ak tou sa ki ladan l' pran fè bri sitèlman yo kontan. Se pou jaden yo ak tou sa ki ladan yo fè fèt.

1 Istwa 16:33 (HCB)
Lè Seyè a parèt se pou tout pyebwa nan gwo rak yo rele sitèlman yo kontan. Paske l'ap vini pou l' jije tout moun ki sou latè.

1 Istwa 16:34 (HCB)
Lwanj pou Seyè a paske li bon. Li p'ap janm sispann renmen nou.

1 Istwa 16:35 (HCB)
Se pou nou di: Delivre nou non, Bondye delivrans nou! Fè nou soti nan tout peyi kote nou gaye yo. Sanble nou, pou nou ka di ou mèsi pou tout bagay ou menm sèl ka fè, pou nou ka kontan lè n'ap fè lwanj ou.

1 Istwa 16:36 (HCB)
Ann fè lwanj Seyè a, Bondye pèp Izrayèl la! Ann fè lwanj li depi tout tan ak pou tout tan. Epi tout pèp la pran reponn: -Wi, se vre! Lwanj pou Seyè a!

1 Istwa 16:37 (HCB)
Lèfini, David kite Asaf ak moun Levi menm fanmi avè l' yo devan Bwat Kontra Seyè a pou yo toujou reskonsab tout sèvis ki pou fèt kote yo te mete Bwat Kontra a. Yo te gen pou fè sèvis yo la chak jou san rete.

1 Istwa 16:38 (HCB)
Obèd-Edon ak swasantwit lòt moun nan fanmi li t'ap ede yo nan travay yo. Osa ak Obèd-Edon, pitit gason Jeditoun lan, te reskonsab pòtay yo.

1 Istwa 16:39 (HCB)
Men David kite Zadòk, prèt la, ak moun Levi menm fanmi avè l' yo ki te prèt tou devan Tant Seyè a, nan kote yo te mete apa pou Seyè a lavil Gabawon.

1 Istwa 16:40 (HCB)
Chak maten, chak aswè, se yo ki pou boule bèt yo ofri bay Seyè a nèt sou lotèl ki fèt pou sa a, dapre sa ki ekri nan lalwa Seyè a te bay pèp Izrayèl la.

1 Istwa 16:41 (HCB)
Te gen avèk yo tou Eyman, Jedoutoun ansanm ak lòt moun yo te chwazi tout espre pou chante: Lwanj pou Seyè a paske li p'ap janm sispann renmen nou.

1 Istwa 16:42 (HCB)
Eyman ak Jedoutoun te gen twonpèt, senbal ki fè gwo bri yo ak lòt enstriman mizik pou yo jwe antan yo t'ap chante fè lwanj pou Bondye. Manm fanmi Jedoutoun yo te reskonsab veye pòtay yo.

1 Istwa 16:43 (HCB)
Apre sa, tout pèp la tounen lakay yo. David tounen lakay li tou pou l' beni fanmi pa l' tou.