Matye 14:1 (HCB)
Lè sa a, Ewòd ki t'ap gouvènen nan peyi Galile tande pale sou Jezi.

Matye 14:2 (HCB)
Li di moun ki t'ap travay avè l' yo: Se Jan Batis wi! Se li ki leve vivan nan lanmò. Se poutèt sa li ka fè tout mirak sa yo.

Matye 14:3 (HCB)
Se Ewòd menm ki te fè arete Jan Batis. Li te fè mare l' mete nan prizon poutèt Ewodyad, madanm Filip, frè li.

Matye 14:4 (HCB)
Paske Jan te di Ewòd konsa: Ou pa gen dwa pran Ewodyad pou madanm ou.

Matye 14:5 (HCB)
Ewòd te vle touye l', men li te pè jwif yo, paske yo tout te pran Jan Batis pou yon pwofèt.

Matye 14:6 (HCB)
Men, jou fèt Ewòd la, pitit fi Ewodyad la t'ap danse devan tout envite yo. Sa te fè Ewòd plezi anpil.

Matye 14:7 (HCB)
Lè sa a, Ewòd sèmante l'ap ba li nenpòt kisa li ta mande li.

Matye 14:8 (HCB)
Pitit fi Ewodyad la menm koute konsèy manman l' te ba li, li di Ewòd: Fè pote tèt Jan Batis ban mwen koulye a sou yon plato.

Matye 14:9 (HCB)
Kè wa a kase. Men, akòz gwo sèman li te fè devan tout envite yo, li bay lòd pou yo bay fi a sa l' te mande a.

Matye 14:10 (HCB)
Se konsa, Ewòd voye koupe tèt Jan Batis nan prizon an.

Matye 14:11 (HCB)
Yo pote tèt la vini sou yon plato, yo renmèt fi a li. Fi a menm pote l' bay manman li.

Matye 14:12 (HCB)
Patizan Jan Batis yo vin pran kò a, yo antere li. Apre sa, y al di Jezi sa ki te pase.

Matye 14:13 (HCB)
Lè Jezi pran nouvèl sa a, li pati nan yon kannòt. Li te vle al yon kote ki pa gen moun pou l' te ka pou kont li. Men, moun yo vin konn sa. Yo kouri soti nan tout lavil yo, yo pran mache sou rivaj la ap swiv li.

Matye 14:14 (HCB)
Lè Jezi desann soti nan kannòt la, li wè tout foul moun yo. Kè l' fè l' mal pou yo, li pran geri moun malad yo.

Matye 14:15 (HCB)
Lè solèy fin kouche, disip Jezi yo pwoche bò kote l', yo di l' konsa: Li fin ta wi. Pa gen moun ki rete bò isit la. Voye moun yo ale pou yo ka achte manje nan bouk yo.

Matye 14:16 (HCB)
Jezi reponn yo: Yo pa bezwen ale. Ba yo manje nou menm.

Matye 14:17 (HCB)
Men yo di li: Se senk pen ak de pwason ase nou gen la a.

Matye 14:18 (HCB)
Jezi di yo: Pote yo ban mwen.

Matye 14:19 (HCB)
Apre sa, li bay lòd fè moun yo chita sou zèb la. Li pran senk pen yo ak de pwason yo, li leve je l' nan syèl la, li di Bondye mèsi. Li kase pen yo, li bay disip yo. Disip yo menm mache bay tout moun.

Matye 14:20 (HCB)
Tout moun manje vant plen. Apre sa, disip yo plen douz panyen ak ti moso ki te rete, yo pote ale.

Matye 14:21 (HCB)
Te gen senkmil (5,000) gason konsa ki te jwenn manje pou yo manje, san konte fanm ak timoun.

Matye 14:22 (HCB)
Touswit apre sa, Jezi fè disip li yo moute nan kannòt la, li voye yo devan lòt bò lanmè a. Li menm, li te rete dèyè pou l' te voye moun yo ale.

Matye 14:23 (HCB)
Lè li fin voye yo ale, li moute pou kont li sou yon ti mòn pou l' lapriyè. Solèy te fin kouche, li te la toujou pou kont li.

Matye 14:24 (HCB)
Kannòt la menm te gen tan yon bon distans sou lanmè a. Men, lanm yo t'ap bat li, paske van an te kontrè pou yo.

Matye 14:25 (HCB)
Douvan jou, Jezi pran mache sou dlo a pou li al jwenn yo.

Matye 14:26 (HCB)
Lè disip yo wè l' ap mache sou dlo a, yo te pè anpil, yo t'ap di: Se yon revenan. Yo pran rele tèlman yo te pè.

Matye 14:27 (HCB)
Menm lè a, Jezi di yo: Pran tèt nou. Se mwen menm. Nou pa bezwen pè.

Matye 14:28 (HCB)
Lè sa a, Pyè di li: Mèt, si se ou menm vre, di m' vin jwenn ou sou dlo a.

Matye 14:29 (HCB)
Jezi di li: Vini non. Pyè soti nan kannòt la, li kòmanse mache sou dlo a pou li al jwenn Jezi.

Matye 14:30 (HCB)
Men, lè Pyè wè jan van an te fò, li pè. Lè sa a, li kòmanse koule, li pran rele: Mèt, sove m' non!

Matye 14:31 (HCB)
Menm lè a, Jezi lonje men l', li pran Pyè, li di li: Gade jan ou manke konfyans. Poukisa ou pa te fin kenbe konfyans ou nèt?

Matye 14:32 (HCB)
Yo tou de moute nan kannòt la, lamenm van an kase.

Matye 14:33 (HCB)
Lè sa a, moun ki te nan kannòt la vin mete ajenou devan Jezi, yo di: Ou se pitit Bondye a vre.

Matye 14:34 (HCB)
Lè yo fin janbe lòt bò lanmè a, yo fè tè nan peyi Jenezarèt.

Matye 14:35 (HCB)
Moun peyi a rekonèt Jezi, yo voye nouvèl la nan tout rejyon an. Yo mennen tout malad yo ba li.

Matye 14:36 (HCB)
Yo di Jezi: Tanpri souple, kite malad yo manyen bò rad ou ase. Tout moun malad ki te manyen rad li te geri.