Resansman 13:1 (HCB)
Seyè a pale ak Moyiz, li di l' konsa:

Resansman 13:2 (HCB)
Ou pral chwazi douz nan chèf fanmi pèp Izrayèl yo, yonn pou chak branch fanmi. Ou pral voye yo pou y' al wè ki jan peyi Kanaran an ye, peyi m'ap bay moun Izrayèl yo.

Resansman 13:3 (HCB)
Dapre lòd Moyiz te resevwa nan men Seyè a, li pran douz gason ki te chèf fanmi nan pèp Izrayèl la. Antan li te nan dezè Paran an, li voye yo al rekonèt peyi a.

Resansman 13:4 (HCB)
Men non yo: Pou branch Woubenn lan, se te Chamwa, pitit gason Zakou a.

Resansman 13:5 (HCB)
Pou branch fanmi Simeyon an, se te Chafa, pitit gason Ori a.

Resansman 13:6 (HCB)
Pou branch fanmi Jida a, se te Kalèb, pitit gason Jefoune a.

Resansman 13:7 (HCB)
Pou branch fanmi Isaka a, se te Jigal, pitit gason Jozèf la.

Resansman 13:8 (HCB)
Pou branch fanmi Efrayim lan, se te Oze, pitit gason Noun lan.

Resansman 13:9 (HCB)
Pou branch fanmi Benjamen an, se te Palti, pitit gason Rafou a.

Resansman 13:10 (HCB)
Pou branch fanmi Zabilon an, se te Gadiyèl, pitit gason Sodi a.

Resansman 13:11 (HCB)
Pou branch fanmi Jozèf la, nan branch Manase a, se te Gadi, pitit gason Souzi a.

Resansman 13:12 (HCB)
Pou branch fanmi Dann lan, se te Amiyèl, pitit gason Jemali a.

Resansman 13:13 (HCB)
Pou branch fanmi Asè a, se te Setou, pitit gason Mikayèl la.

Resansman 13:14 (HCB)
Pou branch fanmi Neftali a, se te Nakbi, pitit gason Wopsi a.

Resansman 13:15 (HCB)
Pou branch fanmi Gad la, se te Geouyèl, pitit gason Maki a.

Resansman 13:16 (HCB)
Se te non douz mesye Moyiz te voye al rekonèt peyi Kanaran an. Moyiz te chanje non Oze, pitit gason Noun lan, li rele l' Jozye.

Resansman 13:17 (HCB)
Lè Moyiz voye yo ale nan peyi Kanaran an, li di yo: -Moute nan peyi a. N'a pase pa Negèv la, n'a pran chemen mòn pou nou.

Resansman 13:18 (HCB)
Ale gade peyi a. Chache konnen ki jan li ye, ki kalite moun ki rete ladan l', konbe yo ye, ak ki fòs yo.

Resansman 13:19 (HCB)
Chache konnen si tè a se yon bon tè osinon yon move tè, si moun yo rete nan lavil ki gen ranpa pou pwoteje yo osinon nan kan anba tant twal.

Resansman 13:20 (HCB)
Chache konnen si peyi a rich osinon pòv, si gen anpil pyebwa sou tè a ou si pa genyen. Nou pa bezwen pè anyen. Lè n'ap tounen, pote kèk nan fwi ki donnen laba a. Se te sezon rezen te konmanse ap mi.

Resansman 13:21 (HCB)
Se konsa mesye yo moute, y' al chache konnen tout bagay ki gen nan peyi a, depi dezè Zin ki nan sid peyi a rive jouk Reyòb toupre pas Amat la, nan nò.

Resansman 13:22 (HCB)
Yo travèse zòn Negèv la, yo rive lavil Ebwon kote moun Ayiman yo, moun Chechayi yo ak moun Talmayi yo rete. Yo tout te fè pati ras moun Anak yo. Ebwon sa a, se yon lavil ki te bati sètan anvan yo te bati lavil Zoan nan peyi Lejip.

Resansman 13:23 (HCB)
Yo rive nan ravin Echkòl, yo koupe yon branch rezen ki te gen yon sèl gwo grap rezen nan li. Yo mete l' sou yon gòl pou de moun te ka pote l' sou zepòl yo, si tèlman li te lou. Yo pote grenad ak fig frans tou.

Resansman 13:24 (HCB)
Yo rele kote sa a Ravin Echkòl, poutèt gwo grap rezen moun pèp Izrayèl yo te koupe la a.

Resansman 13:25 (HCB)
Apre karant jou, lè yo fin vizite toupatou nan peyi a, yo tounen,

Resansman 13:26 (HCB)
yo vin jwenn Moyiz, Arawon ak tout moun pèp Izrayèl yo Kadès, nan dezè Paran an. Yo detaye ba yo tou sa yo te wè, yo moutre yo fwi yo te pote yo.

Resansman 13:27 (HCB)
Yo di Moyiz konsa: -Nou vizite toupatou nan peyi ou te voye nou al chache konnen an. Se yon peyi ki rich anpil, kote lèt ak siwo myèl koule tankou dlo. Se vre wi. Gade fwi nou jwenn ladan l'.

Resansman 13:28 (HCB)
Men, moun ki rete nan peyi a gwonèg anpil. Lavil yo gran, yo byen pwoteje. Sa ki pi rèd nou wè yon kalite ras moun gwonèg bèl wotè.

Resansman 13:29 (HCB)
Moun Amalèk yo rete nan sid peyi a, nan zòn Negèv la. Moun It yo, moun Jebis yo ak moun Amon yo rete nan mòn yo. Moun Kanaran yo rete bò lanmè Mediterane a ak bò larivyè Jouden an.

Resansman 13:30 (HCB)
Kalèb fè moun yo sispann bougonnen sou do Moyiz, li di yo konsa: -Ann moute koulye a. Ann al pran peyi a pou nou. Pa gen anyen la a nou pa ka fè!

Resansman 13:31 (HCB)
Men mesye ki te moute ansanm ak Kalèb yo di konsa: -Non. Nou pa ka al atake moun sa yo. Yo pi fò pase nou.

Resansman 13:32 (HCB)
Se konsa yo pran pale mal sou peyi yo te al vizite a devan pèp Izrayèl la. Yo t'ap di: -Peyi nou ta l' vizite a, peyi nou ta l' chache konnen an, se yon peyi ki pa menm bay kont manje pou moun k'ap viv sou li yo. Epi, tout moun nou wè la se moun ki wo anpil.

Resansman 13:33 (HCB)
Sa ki pi rèd, nou wè yon kalite gwonèg bèl wotè, moun ras Anak yo. Devan moun sa yo se krebete nou ye, tèlman nou piti. Se konsa nou te santi nou devan yo.