Mak 3:1 (HCB)
Apre sa, Jezi tounen ankò nan sinagòg la. Te gen yon nonm ki te gen yon men pòk nan asanble a.

Mak 3:2 (HCB)
Moun ki te la yo t'ap veye Jezi pou wè si li t'ap geri men nonm lan jou repo a, paske yo te vle akize li.

Mak 3:3 (HCB)
Jezi di nonm men pòk la: -Leve, vin kanpe la a nan mitan nou.

Mak 3:4 (HCB)
Epi li di moun ki t'ap gade l' yo: -Kisa lalwa nou an pèmèt moun fè jou repo a? Byen osinon mal? Sove lavi yon nonm osinon kite l' mouri? Men yo pa louvri bouch yo reponn li.

Mak 3:5 (HCB)
Lè sa a Jezi fache, li pwonmennen je l' sou yo tout: sa te fè l' lapenn pou l' te wè jan yo te gen move santiman. Epi li di nonm lan konsa: -Lonje men ou. Nonm lan lonje men li. Latou men an geri.

Mak 3:6 (HCB)
Menm lè a, farizyen yo soti nan sinagòg la, y' al met tèt yo ansanm ak patizan Ewòd yo pou yo wè ki jan pou yo touye Jezi.

Mak 3:7 (HCB)
Jezi wete kò l' ak disip li yo, li ale bò lanmè Galile a. Yon gwo foul moun t'ap swiv li. Yo te soti toupatou: te gen moun Galile, moun Jide,

Mak 3:8 (HCB)
moun lavil Jerizalèm, moun peyi Idime, moun peyi lòt bò larivyè Jouden an, moun nan vwazenaj lavil Tir ak lavil Sidon. Tout foul pèp sa a te vin jwenn li paske yo te tande tou sa l' t'ap fè.

Mak 3:9 (HCB)
Jezi mande disip li yo pou yo pare yon kannòt pou li, pou foul la pa t' toufe l' twòp.

Mak 3:10 (HCB)
Paske, jan li t'ap geri anpil moun, tout malad yo te vide sou li pou yo te manyen li.

Mak 3:11 (HCB)
Chak fwa move lespri yo te wè l', yo te tonbe nan pye l' ap plede rele: -Ou se pitit Bondye a.

Mak 3:12 (HCB)
Men Jezi te pale sevè ak move lespri yo pou yo pa t' di ki moun li te ye.

Mak 3:13 (HCB)
Apre sa, li moute sou yon ti mòn. Li rele moun li te bezwen yo. Yo vin jwenn li.

Mak 3:14 (HCB)
Li chwazi douz nan yo pou mache ak li. Li rele yo apòt, epi li voye yo mache bay mesaj la.

Mak 3:15 (HCB)
Li te ba yo pouvwa pou chase mouve lespri.

Mak 3:16 (HCB)
Men douz moun li te chwazi yo: Se te Simon (Jezi te ba li yon ti non Pyè),

Mak 3:17 (HCB)
de pitit Zebede yo: Jak ak Jan, frè l' la. Jezi te ba yo yon ti non Boanèj, ki vle di Pitit loraj.

Mak 3:18 (HCB)
Te gen Andre, Filip, Batèlmi, Matye, Toma, Jak, pitit Alfe a, Tade, Simon, patriyòt la,

Mak 3:19 (HCB)
ak Jida Iskariòt, nonm ki te lage Jezi nan men lènmi li yo.

Mak 3:20 (HCB)
Apre sa, Jezi tounen lakay li. Te sitèlman gen moun ki te sanble ankò, Jezi ak disip li yo pa t' menm gen tan pou yo te manje.

Mak 3:21 (HCB)
Lè fanmi Jezi yo tande sa, yo soti pou yo vin chache l' paske tout moun t'ap di: -Nonm sa a fou.

Mak 3:22 (HCB)
Dirèktè lalwa ki te desann soti Jerizalèm yo t'ap di konsa: -Li gen Bèlzeboul, gwo wa dyab la, sou li. Yo t'ap di tou: -Se chèf move lespri yo menm ki ba li pouvwa pou chase move lespri yo.

Mak 3:23 (HCB)
Jezi rele yo, li di yo an parabòl: -Ki jan Satan fè ap chase Satan?

Mak 3:24 (HCB)
Si yon peyi gen divizyon ladan l' pou moun yo ap goumen yonn ak lòt, peyi sa a pa la pou lontan.

Mak 3:25 (HCB)
Si gen divizyon nan yon fanmi, fanmi sa a pa la pou lontan.

Mak 3:26 (HCB)
Se sak fè, si Satan konbat pwòp tèt li, si gen divizyon nan peyi Satan, pouvwa Satan an pa la pou lontan. Talè konsa l'ap fini.

Mak 3:27 (HCB)
Pesonn pa kapab antre lakay yon nonm vanyan pou piye sa l' genyen, si li pa mare nonm vanyan an anvan. Lè li fin mare l', la piye kay la.

Mak 3:28 (HCB)
Se vre wi, sa m'ap di nou la a: Bondye va padonnen lèzòm tout peche y'a fè, ak tout move pawòl ki va soti nan bouch yo.

Mak 3:29 (HCB)
Men, moun ki va pale mal sou Sentespri a, moun sa a p'ap janm jwenn padon, paske lè sa a l'ap fè yon peche k'ap rete pou tout tan.

Mak 3:30 (HCB)
Jezi te pale konsa paske yo t'ap di-Li gen yon move lespri sou li.

Mak 3:31 (HCB)
Apre sa, manman Jezi ak frè l' yo vin rive. Yo kanpe deyò a, yo fè rele li.

Mak 3:32 (HCB)
Jezi te nan mitan yon foul moun ki te chita. Yo di l' konsa: -Men manman ou ak frè ou yo deyò a, y'ap mande pou ou.

Mak 3:33 (HCB)
Li reponn yo: -Kilès ki manman m', kilès ki frè mwen?

Mak 3:34 (HCB)
Epi li pwonmennen je l' sou moun ki te chita sou kote l' yo, li di konsa: -Gade: men manman m', men frè m' yo.

Mak 3:35 (HCB)
Paske, tout moun ki fè sa Bondye mande yo fè, se moun sa yo ki frè m', ki sè m', ki manman mwen.