Mak 15 | HCB Bible Study

Mak 15:1 (HCB)
Nan granmaten, chèf prèt yo fè yon reyinyon avèk chèf fanmi yo, dirèktè lalwa yo ansanm ak tout manm Gran Konsèy jwif yo pou pran yon desizyon. Apre yo fin mare Jezi, yo mennen l' ale; yo renmèt li bay Pilat.

Mak 15:2 (HCB)
Pilat menm mande li: -Eske ou se wa jwif yo? Jezi reponn li: -Se ou ki di li.

Mak 15:3 (HCB)
Chèf prèt yo te depoze anpil plent sou do li.

Mak 15:4 (HCB)
Pilat mande l' ankò: -Ou pa reponn anyen? Tande tout plent yo depoze sou do ou.

Mak 15:5 (HCB)
Men Jezi pa reponn anyen toujou. Sa te fè Pilat sezi anpil.

Mak 15:6 (HCB)
Pou chak fèt Delivrans Pilat te konn lage yon prizonye. Se pèp la ki te konn chwazi kilès.

Mak 15:7 (HCB)
Te gen yon nonm yo rele Barabas; li te nan prizon ansanm ak kèk lòt ki t'ap konplote avèk li. Yo te nan prizon poutèt yon nonm yo te touye yon jou yo te pran lezam kont gouvènman an.

Mak 15:8 (HCB)
Foul moun yo moute lakay Pilat; yo pran mande Pilat pou l' lage yon prizonye ba yo jan li te toujou fè a.

Mak 15:9 (HCB)
Li reponn yo: -Eske nou vle mwen lage wa jwif la ban nou?

Mak 15:10 (HCB)
Paske li te byen konnen se jalouzi ki te pouse chèf prèt yo mennen Jezi ba li.

Mak 15:11 (HCB)
Men, chèf prèt yo pran tèt pèp la pou yo mande Pilat pou l' lage Barabas pito.

Mak 15:12 (HCB)
Pilat pran lapawòl ankò, li di yo: -Enben, kisa nou vle m' fè avèk nonm yo rele wa jwif la?

Mak 15:13 (HCB)
Yo rele byen fò: -Kloure l' sou yon kwa!

Mak 15:14 (HCB)
Pilat di yo: -Men, ki move zak li fè konsa? Yo rele pi fò toujou: -Kloure l' sou yon kwa!

Mak 15:15 (HCB)
Pilat te vle fè pèp la plezi: li lage Barabas ba yo. Apre li fin fè yo bat Jezi byen bat, li renmèt li bay sòlda yo pou y' al kloure l' sou yon kwa.

Mak 15:16 (HCB)
Sòlda yo mennen Jezi anndan bèl lakou a (sa vle di, nan kay kòmandan an). Yo rele tout rejiman sòlda yo vini.

Mak 15:17 (HCB)
Yo mete yon gwo rad koulè wouj violèt sou Jezi; yo trese yon kouwòn pikan, yo mete l' nan tèt li.

Mak 15:18 (HCB)
Epi yo pran salwe l' konsa: -Bonjou, wa jwif yo!

Mak 15:19 (HCB)
Yo ba l' kou nan tèt avèk yon baton wozo; yo krache sou li, yo mete ajenou, yo bese tèt yo devan li.

Mak 15:20 (HCB)
Apre yo fin pase l' nan betiz kont kò yo, yo wete gwo rad la; yo mete rad pa l' sou li ankò; epi yo mennen l' ale pou yo kloure l' sou yon kwa.

Mak 15:21 (HCB)
Te gen yon nonm yo rele Simon, moun peyi Sirèn, papa Aleksann ak Rifis. Antan Simon sa a t'ap soti nan jaden, li pase bò la, epi sòlda yo fòse msye pote kwa Jezi a.

Mak 15:22 (HCB)
Yo mennen Jezi yon kote yo rele Gòlgota (ki vle di: Plas zo bwa tèt la).

Mak 15:23 (HCB)
Yo te vle ba li diven melanje ak yon siwo fèt ak lami pou l' te bwè. Men, li pa pran li.

Mak 15:24 (HCB)
Apre yo fin kloure l' sou kwa a, yo separe rad li yo ant yo: yo tire osò pou konnen sa ki t'ap soti pou yo chak.

Mak 15:25 (HCB)
Li te nevè nan maten lè yo te kloure l' sou kwa a.

Mak 15:26 (HCB)
Yo te bay kòz ki fè yo te kondannen l' lan sou yon ti pankat ki te ekri: Wa jwif yo!

Mak 15:27 (HCB)
Yo te kloure de ansasen sou de lòt kwa, anmenmtan avèk Jezi, yonn sou chak bò.

Mak 15:28 (HCB)
Se konsa pawòl ki te ekri a vin rive vre: Yo mete l' ansanm ak mechan yo.

Mak 15:29 (HCB)
Moun ki t'ap pase bò la t'ap plede joure l'; yo t'ap fè siy sou li, yo t'ap di: -Ey! Ou menm ki te vle kraze tanp lan pou ou rebati l' nan twa jou,

Mak 15:30 (HCB)
sove tèt ou non, desann sou kwa a.

Mak 15:31 (HCB)
Konsa tou, chèf prèt yo ak dirèktè lalwa yo t'ap pase l' nan rizib. Yonn t'ap di lòt: -Gade! Li sove lòt moun, li pa ka sove tèt pa li!

Mak 15:32 (HCB)
Se pou Kris la, wa pèp Izrayèl la, desann sou kwa a koulye a. Konsa n'a wè epi n'a kwè. Ata mesye ki te kloure sou lòt kwa yo t'ap joure l' tou.

Mak 15:33 (HCB)
Vè midi konsa, vin gen yon fènwa sou tout peyi a, jouk twazè nan apremidi.

Mak 15:34 (HCB)
Vè twazè, Jezi rele byen fò: -Eloyi, Eloyi, lema sabaktani? (ki vle di: Bondye, Bondye, poukisa ou lage m' konsa?)

Mak 15:35 (HCB)
Nan moun ki te la yo genyen ki te tande l' pale. Yo di: -Koute. Men l'ap rele Eli.

Mak 15:36 (HCB)
Yonn nan yo kouri, li al tranpe yon eponj nan venèg, li mete l' nan pwent yon gòl wozo, li lonje l' bò bouch Jezi ba l' bwè. Epi li di: -Rete! Ann wè si Eli va vin desann li sou kwa a!

Mak 15:37 (HCB)
Men Jezi bay yon gwo rèl, epi li mouri.

Mak 15:38 (HCB)
Rido ki te nan tanp lan chire an de moso depi anwo jouk anba.

Mak 15:39 (HCB)
Te gen yon kaptenn lame kanpe anfas Jezi. Lè l' wè Jezi mouri konsa, li di: -Nonm sa a, se te pitit Bondye tout bon.

Mak 15:40 (HCB)
Te gen kèk fanm la tou; men yo te rete lwen ap gade. Pami yo te gen Mari, moun lavil Magdala a, Mari, manman Ti Jak ak Jòz, ansanm ak Salome.

Mak 15:41 (HCB)
Medam sa yo t'ap swiv Jezi, se yo ki t'ap okipe l' depi lè l' te nan peyi Galile. Te gen anpil lòt tou ki te moute lavil Jerizalèm ansanm ak li.

Mak 15:42 (HCB)
Solèy te fin kouche, se te jou preparasyon jwif yo (ki vle di: lavèy jou repo a).

Mak 15:43 (HCB)
Lè sa a Jozèf, yon moun lavil Arimate, vin rive. Se te yon manm respektab nan Gran Konsèy jwif yo. Li menm tou li t'ap tann lè Bondye t'ap vin pran gouvènman an nan men pa li. Li te gen kouraj ale devan Pilat mande kò Jezi.

Mak 15:44 (HCB)
Men, Pilat te sezi lè l' vin konnen Jezi te gen tan mouri. Li voye rele kaptenn lan, li mande l' si Jezi te mouri depi lontan.

Mak 15:45 (HCB)
Lè kaptenn lan fin ba li repons sèten, li bay Jozèf kò a.

Mak 15:46 (HCB)
Jozèf achte yon bèl dra blan, li desann kò Jezi sou kwa a, li vlope l' nan dra a, epi li mete l' nan yon kavo yo te fouye nan wòch la. Apre sa, li woule yon gwo wòch devan bouch kavo a.

Mak 15:47 (HCB)
Mari, moun lavil Magdala a, ansanm ak Mari, manman Jòz, t'ap gade kote yo mete kò a.

Mak 15 HCB

Mak (HCB) Chapter Selection

HCB Book Selection List