Egzod 25 | HCB Bible Study

Egzod 25:1 (HCB)
Seyè a pale ak Moyiz, li di l':

Egzod 25:2 (HCB)
Pale ak moun Izrayèl yo. Di yo pote yon ofrann ban mwen. W'a resevwa l' pou mwen nan men tout moun ki vle bay ak kè kontan.

Egzod 25:3 (HCB)
Men ofrann pou ou resevwa nan men yo: lò, ajan ak kwiv,

Egzod 25:4 (HCB)
bon twal koulè violèt, ble ak wouj, twal fen blan, twal fèt ak pwal kabrit,

Egzod 25:5 (HCB)
po belye tenn koulè wouj ak po bazann, bwa zakasya,

Egzod 25:6 (HCB)
lwil pou gwo lanp sèt branch lan, epis santi bon pou mete nan lansan an ak nan lwil yo sèvi pou mete moun apa pou sèvis Bondye a,

Egzod 25:7 (HCB)
pyè oniks ak lòt pyè pou gani jile ak plastwon granprèt la.

Egzod 25:8 (HCB)
y'a mete yon kote apa pou mwen pou m' ka vin rete nan mitan yo.

Egzod 25:9 (HCB)
W'a fè tant lan ak tout bagay ki pou ale ladan l', dapre modèl mwen pral ba ou a.

Egzod 25:10 (HCB)
y'a pran bwa zakasya, y'a fè yon gwo bwat. Bwat la va mezire twa pye nèf pous longè, de pye twa pous lajè, de pye twa pous wotè.

Egzod 25:11 (HCB)
W'a kouvri l' nèt, anndan kou deyò, ak pi bon klas lò ki genyen. Epi w'a mete yon bòdi an lò fè wonn li.

Egzod 25:12 (HCB)
W'a fonn lò a fè kat gwo bag tou won. W'a moute yonn sou chak kwen bwat la, de chak bò.

Egzod 25:13 (HCB)
W'a pran de jenn poto zakasya, w'a kouvri yo nèt ak lò.

Egzod 25:14 (HCB)
W'a pase poto yo nan twou bag yo, sou de bò bwat la. Poto sa yo va sèvi manch pou pote bwat la.

Egzod 25:15 (HCB)
Se pou poto yo toujou rete nan bag yo, san yo pa janm wete yo.

Egzod 25:16 (HCB)
Mwen pral ba ou de ròch plat ki va sèvi pou nou toujou chonje m'. W'a mete yo nan bwat la.

Egzod 25:17 (HCB)
W'a pran pi bon lò ki genyen, w'a fè yon kouvèti pou bwat la. L'a mezire twa pye nèf pous longè sou de pye twa pous lajè.

Egzod 25:18 (HCB)
W'a fè pòtre de zanj cheriben an lò. y'a pran lò a, y'a bat li ak mato pou yo fè pòtre yo. W'a mete yo anwo kouvèti a,

Egzod 25:19 (HCB)
yonn sou bò dwat, yonn sou bò gòch. W'a kole yo byen kole sou kouvèti a pou yo fè kò avè l'.

Egzod 25:20 (HCB)
Zanj cheriben yo va louvri zèl yo anwo tèt yo, konsa y'a kouvri kouvèti a. Se pou yo yonn anfas lòt, avèk tèt yo bese ap gade kouvèti a.

Egzod 25:21 (HCB)
W'a mete kouvèti a sou bwat la. Nan bwat la menm, w'a mete de ròch plat mwen pral ba ou pou nou ka toujou chonje mwen.

Egzod 25:22 (HCB)
Se la m'a toujou kontre avè ou. m'a rete anwo kouvèti a, nan mitan de zanj cheriben yo, m'a ba ou tout lòd mwen gen pou m' ba ou yo pou moun Izrayèl yo.

Egzod 25:23 (HCB)
W'a fè yon tab an bwa zakasya. Desi tab la va mezire twa pye longè, yon pye sis pous lajè ak de pye twa pous wotè.

Egzod 25:24 (HCB)
W'a kouvri l' nèt ak pi bon lò ki genyen. W'a mete yon bòdi an lò fè wonn li.

Egzod 25:25 (HCB)
W'a mete yon ankadreman kat pous lajè anba desi a fè wonn tab la. Epi w'a kouvri tout ankadreman an ak yon plak lò.

Egzod 25:26 (HCB)
W'a fonn lò a fè kat gwo bag tou won pou tab la. W'a moute yo nan kat kwen tab la kote pye yo moute a.

Egzod 25:27 (HCB)
W'a moute bag yo toupre ankadreman an. Se nan twou bag yo pou ou pase poto bwa zakasya ki pou sèvi pou pote tab la.

Egzod 25:28 (HCB)
W'a fè poto yo ak bwa zakasya, epi w'a kouvri yo nèt ak lò. Se ak poto sa yo pou yo sèvi pou pote tab la.

Egzod 25:29 (HCB)
W'a fè asyèt, bòl, tas, kafetyè. W'a mete yo apa pou mwen. W'a fè yo ak pi bon lò ki genyen. Se ak yo pou nou sèvi lè n'ap fè sèvis pou mwen.

Egzod 25:30 (HCB)
Epi w'a toujou mete sou tab la pen yo ofri ban mwen yo. Wi, se pou pen yo tout tan la devan mwen.

Egzod 25:31 (HCB)
W'a fè yon gwo lanp sèt branch ak pi bon lò ki genyen. y'a pran yon sèl gwo mòso lò, y'a bat li ak mato pou fè pye gwo lanp sèt branch lan ansanm ak tout kò li. y'a fè pòtre bèl flè, flè an bouton, flè louvri, sou tout kò li. Yo tout va fè yon sèl pyès ak pye lanp lan.

Egzod 25:32 (HCB)
Gwo lanp lan va gen sèt branch, yonn kanpe dwat nan mitan ak twa branch chak bò.

Egzod 25:33 (HCB)
Sou chak branch sou kote yo, y'a fè pòtre twa flè nwa kajou ak tout boujon yo.

Egzod 25:34 (HCB)
Sou branch ki nan mitan an va gen kat flè nwa kajou ak tout boujon yo.

Egzod 25:35 (HCB)
W'a mete yon ti boujon anba chak pè branch sou kote yo.

Egzod 25:36 (HCB)
Boujon yo ak branch yo va fè yon sèl pyès ak pye gwo lanp lan. Se va yon sèl pyès lò y'a bat ak mato pou ba li fòm yo vle a.

Egzod 25:37 (HCB)
y'a fè sèt lanp pou gwo lanp lan, y'a moute yo sou li yon jan pou yo ka klere sou devan.

Egzod 25:38 (HCB)
N'a fè pensèt pou netwaye gwo lanp lan ak plato pou resevwa sann lan. W'a fè yo ak pi bon lò ki genyen.

Egzod 25:39 (HCB)
N'a pran swasannkenz liv bon lò pou fè gwo lanp lan ansanm ak tout bagay pou sèvi ak gwo lanp lan.

Egzod 25:40 (HCB)
Gade byen pou ou ka fè tout bagay dapre modèl mwen te moutre ou sou mòn lan.

Previous Chapter
« Egzod 24

Next Chapter
Egzod 26 »

Egzod (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

HCB Book Selection List

View full list of HCB Bible Books and Chapters