Egzod 20 | HCB Bible Study

« Egzod 19

Egzod 21 »

Egzod 20:1 (HCB)
Bondye pran pale, li di:

Egzod 20:2 (HCB)
Se mwen menm, Seyè a, Bondye nou an, ki te fè nou soti nan peyi Lejip kote nou te esklav la.

Egzod 20:3 (HCB)
Piga nou gen lòt bondye pase mwen menm sèlman.

Egzod 20:4 (HCB)
Piga nou janm fè ankenn estati ni ankenn pòtre ki sanble bagay ki anwo nan syèl la, osinon bagay ki sou latè ou ankò nan dlo anba tè a.

Egzod 20:5 (HCB)
Piga nou adore yo, ni piga nou sèvi yo. Paske mwen menm, Seyè a, Bondye nou an, mwen se yon Bondye ki fè jalouzi. Lè yon moun rayi m', mwen fè pitit li, pitit pitit li ak pitit pitit pitit li yo peye sa.

Egzod 20:6 (HCB)
Men, lè yon moun renmen m', lè li fè sa m' mande l' fè, m'ap moutre l' jan mwen renmen l' tou ansanm ak tout pitit pitit li yo pandan mil jenerasyon.

Egzod 20:7 (HCB)
Piga nou sèvi mal ak non Seyè a, Bondye nou an, paske Seyè a p'ap manke pa pini moun ki sèvi mal avèk non li.

Egzod 20:8 (HCB)
Toujou chonje jou repo a pou nou mete l' apa pou mwen.

Egzod 20:9 (HCB)
N'a travay sis jou. Lè sa yo n'a fè tou sa nou gen pou fè.

Egzod 20:10 (HCB)
Men, setyèm jou a, se jou repo pou nou mete apa pou Seyè a, Bondye nou an. Jou sa a, nou p'ap fè ankenn travay, ni nou menm, ni pitit gason nou, ni pitit fi nou, ni moun k'ap travay lakay nou, ni bèt nou yo, ni etranje ki lakay nou.

Egzod 20:11 (HCB)
Paske, Seyè a te pran sis jou pou l' fè syèl la, latè a ak lanmè a ansanm ak tou sa ki ladan yo. Apre sa, sou setyèm jou a, li pran repo. Se poutèt sa, Seyè a beni jou repo a, li mete l' apa pou li.

Egzod 20:12 (HCB)
Respekte manman nou ak papa nou pou nou ka viv lontan nan peyi Seyè a, Bondye nou an, ban nou an.

Egzod 20:13 (HCB)
Piga nou touye moun.

Egzod 20:14 (HCB)
Piga nou fè adiltè.

Egzod 20:15 (HCB)
Piga nou pran sa ki pa pou nou.

Egzod 20:16 (HCB)
Piga nou bay manti sou frè parèy nou.

Egzod 20:17 (HCB)
Piga nou pote lanvi sou sa ki pa pou nou: ni sou kay frè parèy nou, ni sou madanm li, ni sou moun k'ap sèvi lakay li, ni sou bèf li, ni sou bourik li, ni sou ankenn lòt bagay ki pou frè parèy nou.

Egzod 20:18 (HCB)
Lè pèp la tande bri loraj la ak son twonpèt la, lè yo wè kout zèklè sou kout zèklè, ak mòn lan ki t'ap pouse lafimen, yo tranble sitèlman yo te pè. Yo ret kanpe byen lwen.

Egzod 20:19 (HCB)
Yo di Moyiz konsa: -Pito se ou menm ki pale ak nou, n'a koute sa w'ap di. Men, si se Bondye ki pou pale avèk nou, n'a mouri.

Egzod 20:20 (HCB)
Moyiz di pèp la: -Nou pa bezwen pè. Bondye vini pou wè kote nou ye avèk li. Li vle pou nou toujou gen krentif pou li, pou nou pa lage kò nou nan fè peche.

Egzod 20:21 (HCB)
Men pèp la rete kanpe byen lwen. Sèl Moyiz te pwoche kote nwaj nwa a kote Bondye te ye a.

Egzod 20:22 (HCB)
Seyè a di Moyiz: -Men sa pou ou di moun pèp Izrayèl yo: Nou wè ki jan mwen ret nan syèl la pou m' pale ak nou.

Egzod 20:23 (HCB)
Piga n al fè lòt bondye an ajan osinon an lò pou nou sèvi yo ansanm avè m'.

Egzod 20:24 (HCB)
N'a bati yon lòtèl an tè pou mwen. Se sou li n'a ofri bèt n'a touye pou boule nèt yo ak bèt n'a touye pou di mèsi. Se sou li n'a ofri mouton ak bèf nou yo. Chak kote m'a di nou pou nou fè sèvis pou mwen, m'a vin jwenn nou la, m'a beni nou.

Egzod 20:25 (HCB)
Si nou fe yon lòtèl ak ròch pou mwen, pa travay ròch n'a pran pou fè l' la. Paske lè ou travay yon ròch ak sizo, li pa ka sèvi pou mwen ankò.

Egzod 20:26 (HCB)
Piga nou sèvi ak macheskalye pou nou moute sou lòtèl mwen pou moun pa wè anba rad nou.

Previous Chapter
« Egzod 19

Next Chapter
Egzod 21 »

Egzod (HCB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

HCB Book Selection List

View full list of HCB Bible Books and Chapters