1 Korint 16:1 (HCB)
Kanta lajan nou t'ap ranmase pou ede pèp Bondye ki lavil Jerizalèm lan, se pou nou fè tankou mwen te di legliz nan peyi Galasi yo fè.

1 Korint 16:2 (HCB)
Chak premye jou nan senmenn lan, se pou chak moun mete yon ti lajan apa dapre sa yo te fè. Y'a sere l' lakay yo. Konsa, nou p'ap bezwen tann se lè m' rive lakay nou pou n'ap chache lajan an.

1 Korint 16:3 (HCB)
Lè m' ava rive, n'a chwazi kèk moun pou m' voye pote kado nou fè a ale lavil Jerizalèm ak yon lèt rekòmandasyon.

1 Korint 16:4 (HCB)
Si sa merite pou m' ale tou, y'a fè vwayaj la ansanm avè mwen.

1 Korint 16:5 (HCB)
M'a vin lakay nou lè m'a fin pase nan peyi Masedwan. Paske, fòk mwen pase la anvan.

1 Korint 16:6 (HCB)
Mwen ka rete pase kèk jou lakay nou. Mwen ka menm pase tout sezon fredi a avè nou. Apre sa, n'a ka ede m' ale kote m'a gen pou mwen ale a.

1 Korint 16:7 (HCB)
Fwa sa a, mwen pa vle wè nou anpasan konsa. Mwen ta renmen rete pase kèk tan ak nou, si Bondye vle.

1 Korint 16:8 (HCB)
Men, mwen fè lide rete isit nan lavil Efèz jouk pou fèt Lapannkòt.

1 Korint 16:9 (HCB)
Paske nan lavil sa a, mwen jwenn yon bon okazyon pou m' fè travay mwen, atout gen anpil moun ki pa vle wè mwen.

1 Korint 16:10 (HCB)
Si Timote rive bò kote nou ye a, n'a fè yon jan pou l' santi l' lakay li nan mitan nou, paske se menm jan avè mwen li travay pou Seyè a.

1 Korint 16:11 (HCB)
Pa kite pesonn meprize li. Se pou nou ede l' pou li ka kontinye vwayaj li ak kè poze, pou l' ka tounen vin jwenn mwen. Paske, n'ap tann li ak frè yo.

1 Korint 16:12 (HCB)
Kanta frè Apolòs, mwen pa t' manke ankouraje l' pou l' te vin lakay nou. Men, sanble lide li pa sou sa koulye a. Enben, la fè vwayaj la lè la kapab.

1 Korint 16:13 (HCB)
Pa bliye kò nou. Kenbe fèm nan konfyans nou. Mete kouraj sou nou. Pa moutre nou fèb.

1 Korint 16:14 (HCB)
Se pou nou fè tout bagay avèk renmen nan kè nou.

1 Korint 16:15 (HCB)
Frè m' yo, nou konnen Estefanas ak tout fanmi li. Nou konnen se yo menm premye moun nan peyi Lakayi ki te mete konfyans yo nan Kris la. Tout moun nan fanmi an te ofri tèt yo pou sèvi pèp Bondye a.

1 Korint 16:16 (HCB)
Enben, moun konsa ansanm ak moun nou wè k'ap travay ak yo epi k'ap sèvi ak yo, nou mèt kite yo mennen nou.

1 Korint 16:17 (HCB)
Mwen pa manke kontan pou Estefanas, Fòtenatis, Akaykis ki vin wè mwen. Yo fè m' santi se tankou si se nou menm menm ki te la avèk mwen.

1 Korint 16:18 (HCB)
Yo remoute kouraj mwen, menm jan yo te remoute kouraj nou. Moun konsa, se pou nou konnen ki jan pou nou konsidere yo.

1 Korint 16:19 (HCB)
Legliz ki nan peyi Lazi yo voye bonjou pou nou. Akilas ak Prisil ansanm ak legliz ki reyini lakay yo a voye yon pakèt bonjou pou nou nan Seyè a.

1 Korint 16:20 (HCB)
Tout frè ki isit yo voye bonjou pou nou tou. Nou menm, bò pa nou, yonn di lòt bonjou pou mwen, yonn bo lòt tankou moun k'ap viv pou Bondye.

1 Korint 16:21 (HCB)
M'ap ekri nou sa ak men pa m': Pòl voye bonjou pou nou tout.

1 Korint 16:22 (HCB)
Si yon moun pa renmen Seyè a, madichon pou li. Seyè nou, vini non!

1 Korint 16:23 (HCB)
Se pou benediksyon Jezi Seyè a toujou la avè nou.

1 Korint 16:24 (HCB)
Mwen renmen nou tout nan Jezikri.