1 Korint 12:1 (HCB)
Ann wè koulye a keksyon kado Sentespri bay la. Frè m' yo, mwen ta vle nou konnen sa ki vre sou keksyon kado sa yo.

1 Korint 12:2 (HCB)
Nou chonje, lè nou pa t' ankò gen konfyans, nou te kite yo mennen nou jan yo vle devan zidòl ki pa t' kapab pale.

1 Korint 12:3 (HCB)
Se poutèt sa mwen vle nou konn sa byen: Si Sentespri Bondye ap dirije lavi yon moun, li p'ap janm ka di: Madichon pou Jezi. Konsa tou, si Sentespri Bondye p'ap dirije lavi yon moun, li p'ap ka di Jezi se Seyè a.

1 Korint 12:4 (HCB)
Gen divès kalite don Sentespri a bay. Men, se menm Lespri Bondye a ki bay tout.

1 Korint 12:5 (HCB)
Gen divès jan moun ka sèvi Bondye, men se yon sèl Seyè a n'ap sèvi.

1 Korint 12:6 (HCB)
Gen divès kalite travay nan sèvis la, men se yon sèl Bondye ki bay chak moun travay pa yo nan tout sèvis k'ap fèt.

1 Korint 12:7 (HCB)
Lespri Bondye a fè travay li yon jan nan lavi chak moun, men li fè l' pou byen tout moun.

1 Korint 12:8 (HCB)
Lespri a bay yon moun don pou l' pale avèk bon konprann. Menm Lespri a bay yon lòt moun don pou l' pale avèk anpil konesans.

1 Korint 12:9 (HCB)
Se menm Lespri a ki bay yon moun lafwa, se li menm tou ki bay yon lòt don pou l' geri moun malad.

1 Korint 12:10 (HCB)
Lespri a bay yon moun don pou fè mirak, li bay yon lòt don pou l' bay mesaj ki soti nan Bondye. Li bay yon lòt ankò don pou l' rekonèt travay move lespri yo ak travay Lespri Bondye a. Li bay yon moun don pou l' ka pale langaj, li bay yon lòt don pou l' ka esplike sa pawòl langaj la vle di.

1 Korint 12:11 (HCB)
Men, se yon sèl Lespri a ki fè tou sa. Li bay chak moun yon kado diferan jan li vle.

1 Korint 12:12 (HCB)
Konsa, Kris la se tankou yon kò ki gen anpil manm. Kò a toujou yon sèl kò, ou mèt wè li gen anpil manm.

1 Korint 12:13 (HCB)
Se sak fè, nou menm, kit nou jwif, kit nou pa jwif, kit nou esklav, kit nou pa esklav, nou tout nou te resevwa batèm pou n' te ka fè yon sèl kò ansanm, pa pouvwa yon sèl Lespri a. Nou tout nou te bwè nan yon sèl Lespri a.

1 Korint 12:14 (HCB)
Se pa yon sèl manm ki fè yon kò. Se anpil manm ki fè yon kò.

1 Korint 12:15 (HCB)
Si pye te ka di: Paske se pa yon men mwen ye, mwen p'ap fè pati kò a, se pa sa ki pou ta fè l' pa fè pati kò a vre.

1 Korint 12:16 (HCB)
Si zòrèy te ka di: Paske se pa yon grenn je mwen ye, mwen p'ap fè pati kò a, se pa sa ki pou ta fè l' pa fè pati kò a vre.

1 Korint 12:17 (HCB)
Si tout kò a te yon grenn je, ki jan l' ta ka tande? Si l' te yon zòrèy, ki jan l' ta ka pran sant?

1 Korint 12:18 (HCB)
Men, Bondye mete divès manm nan plas yo nan kò a, jan l' vle.

1 Korint 12:19 (HCB)
Pa ta gen yon kò si tout te yon sèl kalite manm.

1 Korint 12:20 (HCB)
Konsa, gen anpil manm, men gen yon sèl kò.

1 Korint 12:21 (HCB)
Nan kondisyon sa a, grenn je a pa ka di men an: Mwen pa bezwen ou. Tèt la pa ka di pye yo: Mwen pa bezwen nou.

1 Korint 12:22 (HCB)
Okontrè, manm ki parèt pi fèb nan kò nou, se yo ki pi nesesè.

1 Korint 12:23 (HCB)
Manm nou pa bay gwo konsiderasyon nan kò nou, nou pran swen yo plis pase lòt yo. Manm ki pa konvenab pou nou pale sou yo an sosyete, se yo menm ki resevwa yon swen apa.

1 Korint 12:24 (HCB)
Manm nan kò nou ki pi prezantab, yo pa bezwen tou sa. Bondye ranje kò a yon jan pou manm ki pa jwenn anpil konsiderasyon an se li ki jwenn plis swen pase lòt yo.

1 Korint 12:25 (HCB)
Konsa, pa gen divizyon nan kò a. Men tout manm yo yonn pran swen lòt menm jan an.

1 Korint 12:26 (HCB)
Si yon manm nan kò a ap soufri, tout lòt yo ap soufri avè l' tou. Si yon manm resevwa lwanj, tout lòt yo kontan avèk li.

1 Korint 12:27 (HCB)
Nou tout, nou se kò Kris la: nou chak se yon manm nan kò sa a.

1 Korint 12:28 (HCB)
Se konsa, nou wè nan legliz la Bondye mete apòt yo an premye, pwofèt yo an dezyèm, dirèktè yo an twazyèm. Apre sa, nou jwenn moun k'ap fè mirak, moun ki gen don pou geri moun malad, moun k'ap ede lòt, moun k'ap dirije, moun ki gen don pou pale divès lang.

1 Korint 12:29 (HCB)
Men, tout moun pa apòt, tout moun pa pwofèt, tout moun pa dirèktè, tout moun pa gen don pou fè mirak.

1 Korint 12:30 (HCB)
Tout moun pa gen don pou geri moun malad. Tout moun pa gen don pou pale langaj, osinon pou esplike sans pawòl langaj la.

1 Korint 12:31 (HCB)
Nan fon kè nou, se pou nou chache gen don ki pi enpòtan yo. Men, mwen pral moutre nou yon jan ki bon nèt. Pa gen pase li.