Chante Salomon 1:1 (HCB)
Men pi bèl chante nan tout chante Salomon yo.

Chante Salomon 1:2 (HCB)
Bo m' non, kouvri m' ak bo! Karès ou pi dous pase siwo myèl.

Chante Salomon 1:3 (HCB)
Ou gen yon bon sant k'ap soti nan tout kò ou. Depi yo tande non ou, sant ou vin nan nen yo. Se sa ki fè jenn fi yo renmen ou konsa!

Chante Salomon 1:4 (HCB)
Pran m' avè ou non! Ann kouri ale! Se ou menm ki wa mwen. Mennen m' nan chanm ou. Depi ou la, se pa ti kontan n'ap kontan. N'ap chante karès ou ki pi dous pase siwo myèl. Jenn fi yo gen rezon renmen ou konsa!

Chante Salomon 1:5 (HCB)
Medam lavil Jerizalèm, Po m' boule, men m' bèl! Po m' menm koulè ak tant nan dezè a. Men, li bèl tankou rido nan palè Salomon an.

Chante Salomon 1:6 (HCB)
Pa gade sou koulè po m'! Se solèy la ki boule m' konsa. Frè m' yo te move sou mwen. Yo fè m' travay nan jaden rezen lòt moun. M' pa t' gen tan pou m' okipe jaden rezen pa m'.

Chante Salomon 1:7 (HCB)
Manyè di m' non, ou menm mwen renmen anpil la, kibò ou pral mennen mouton yo manje? Kibò yo pral pare solèy midi? Konsa m' p'ap bezwen mache chache ou tankou moun fou nan mitan mouton lòt gadò parèy ou yo.

Chante Salomon 1:8 (HCB)
Bèl fanm pase ou, nanpwen! Ki jan ou fè pa konn kote sa a? Ale non. Swiv mouton yo. W'a jwenn manje bò la pou kabrit ou yo, toupre tant gadò yo.

Chante Salomon 1:9 (HCB)
Ou menm mwen renmen anpil la, w'ap boulvèse mesye yo, menm jan yon jiman ap boulvèse poulen chwal cha lagè farawon yo.

Chante Salomon 1:10 (HCB)
Ala bèl figi ou bèl nan mitan très cheve ou yo! Ala bèl kou ou bèl ak kolye ou yo!

Chante Salomon 1:11 (HCB)
Men, n'ap fè yon chenn lò pou ou ak ti moso ajan kole ladan l'.

Chante Salomon 1:12 (HCB)
Mèt mwen te kouche sou kabann li. Sant odè mwen an te gaye toupatou.

Chante Salomon 1:13 (HCB)
Mennaj mwen tankou yon pake bazilik, ki poze sou tete m'.

Chante Salomon 1:14 (HCB)
Mennaj mwen tankou yon bouke flè k'ap fleri nan jaden rezen Angedi.

Chante Salomon 1:15 (HCB)
Ala bèl ou bèl, anmòrèz mwen! Ala bèl ou bèl! Je ou yo ou ta di de ti pijon.

Chante Salomon 1:16 (HCB)
Ala bèl ou bèl, mennaj mwen! Se pa ti kontan ou fè m' kontan. Zèb yo sèvi nou kabann!

Chante Salomon 1:17 (HCB)
Branch bwa sèd yo sèvi nou travès kay, branch pye chenn yo sèvi nou twati.