Plenn 3 | HCB Bible Study

Plenn 3:1 (HCB)
Mwen se yon nonm ki konnen mizè moun gen pou pase lè Bondye ankòlè sou yo, lè Bondye ap pini yo.

Plenn 3:2 (HCB)
Li trennen m', li fè m' mache nan fènwa san yon ti limyè pou klere m'.

Plenn 3:3 (HCB)
Tout lajounen, l'ap plede bat mwen san rete.

Plenn 3:4 (HCB)
Po kò m' fin chire, vyann mwen parèt deyò konsa. Li kraze tout zo nan kò m'.

Plenn 3:5 (HCB)
Li fèmen m' nan yon koridò mizè ak lafliksyon.

Plenn 3:6 (HCB)
Li fè m' rete kote ki fènwa a tankou moun mouri yo.

Plenn 3:7 (HCB)
Li moute yon miray, li fèmen kote m' ye a, m' pa ka chape. Li mare m' ak gwo chenn.

Plenn 3:8 (HCB)
Tout rele mwen rele byen fò, pesonn p'ap tande m'.

Plenn 3:9 (HCB)
Li simen gwo wòch toupatou sou wout mwen. Kote m' vire, chak pa mwen fè, m' bite.

Plenn 3:10 (HCB)
Tankou yon lous, li biske kò l', l'ap veye m'. Tankou yon lyon, li kache, l'ap tann mwen.

Plenn 3:11 (HCB)
Li fè m' tonbe nan bwa. Li filange tout kò m'. Lèfini, li lage m'.

Plenn 3:12 (HCB)
Li mete flèch nan banza li, li vize. Se sou mwen l'ap voye yo.

Plenn 3:13 (HCB)
Li fè flèch li yo antre fon nan kò m'.

Plenn 3:14 (HCB)
Tout moun nan peyi a ap pase m' nan betiz. Se toutan y'ap fè chante sou mwen.

Plenn 3:15 (HCB)
Li plen vant mwen ak manje anmè kou fyèl. Li fè m' bwè labsent jouk mwen sou.

Plenn 3:16 (HCB)
Li fwote tout figi m' atè, li fè m' kase dan m' nan wòch.

Plenn 3:17 (HCB)
Mwen pa konnen sa yo rele kè poze. Mwen bliye sa yo rele kè kontan.

Plenn 3:18 (HCB)
Mwen di: M' pa gen lontan pou m' viv ankò. M' pèdi tout espwa mwen te gen nan Bondye.

Plenn 3:19 (HCB)
Lè m' chonje nan ki mizè mwen ye, jan m'ap mache pwonmennen san rete, se tankou yon labsent, yon fyèl m'ap vale.

Plenn 3:20 (HCB)
Wi, lè m' chonje sa, kè m' sere, m' santi kè m' ap rache

Plenn 3:21 (HCB)
Men, mwen reprann kouraj lè m' chonje yon sèl bagay.

Plenn 3:22 (HCB)
Seyè a pa janm sispann renmen nou. L'ap toujou gen pitye pou nou.

Plenn 3:23 (HCB)
Tankou solèy la ki leve chak maten konsa tou l'ap toujou kenbe pawòl li.

Plenn 3:24 (HCB)
Mwen di: Se Seyè a ki tout mwen. Se nan li mwen mete tout espwa m'.

Plenn 3:25 (HCB)
Seyè a bon pou tout moun ki mete konfyans yo nan li, pou moun k'ap konte sou li.

Plenn 3:26 (HCB)
Sa bon pou nou rete dousman ap tann li vin delivre nou.

Plenn 3:27 (HCB)
Sa bon pou nou aprann sipòte depi nou tou jenn.

Plenn 3:28 (HCB)
Lè Bondye ap manyen ak nou, ann chita pou kont nou san di anyen.

Plenn 3:29 (HCB)
Nou pa bezwen plenyen. Nou pa janm konnen, ka gen espwa toujou.

Plenn 3:30 (HCB)
Se pou n' pare figi n' pou n' pran souflèt. Se pou n' asepte tou sa yo fè nou.

Plenn 3:31 (HCB)
Bondye sèl Mèt la p'ap janm lage nou nèt.

Plenn 3:32 (HCB)
Li ka fè nou lapenn, men l'ap gen pitye pou nou paske li renmen nou anpil.

Plenn 3:33 (HCB)
Li pa pran plezi nan fè nou soufri, ni nan ban nou lapenn.

Plenn 3:34 (HCB)
Atò, se konnen Seyè a, Bondye sèl Mèt la, pa konnen lè y'ap kraze prizonye anba baton,

Plenn 3:35 (HCB)
lè yo derefize rekonèt dwa Bondye ban nou,

Plenn 3:36 (HCB)
lè y'ap bay move jijman nan tribinal! Atò, se konnen li pa konnen!

Plenn 3:37 (HCB)
Depi Bondye Sèl Mèt la pale, se fini! Sa l' di se sak fèt.

Plenn 3:38 (HCB)
Tou sa ki rive an byen osinon an mal, se li menm ki penmèt sa.

Plenn 3:39 (HCB)
Lè nou anba bwa pou peche nou yo sa nou bezwen plenyen fè!

Plenn 3:40 (HCB)
Annou gade jan n'ap mennen bak nou! Ann egzaminen byen jan n'ap viv la! Lèfini, ann tounen vin jwenn Bondye!

Plenn 3:41 (HCB)
Ann leve bra nou nan syèl la, ann lapriyè nan pye l'!

Plenn 3:42 (HCB)
Nou peche, nou kenbe tèt avè ou! Men, ou menm ou pa padonnen nou.

Plenn 3:43 (HCB)
Ou move pi rèd, ou fann nan kò nou! Ou te san pitye. Ou touye nou.

Plenn 3:44 (HCB)
Ou vlope kò ou nan yon gwo nwaj nwa pou lapriyè nou pa rive nan zòrèy ou.

Plenn 3:45 (HCB)
Ou fè nou tounen yon depotwa, yon pil fatra nan mitan lòt nasyon sou latè yo.

Plenn 3:46 (HCB)
Tout lènmi nou yo ap lave bouch yo sou nou.

Plenn 3:47 (HCB)
N'ap viv ak kè sote, si se pa lanmò, se gwo danje, se gwo malè!

Plenn 3:48 (HCB)
De je m' yo ap ponpe dlo tankou larivyè, lè m' wè malè ki tonbe sou pèp mwen an!

Plenn 3:49 (HCB)
Dlo ap koule nan je m' san rete. Li p'ap janm sispann,

Plenn 3:50 (HCB)
jouk jou Seyè a va rete nan syèl la, l'a voye je l' gade, l'a wè!

Plenn 3:51 (HCB)
Wi, kè m' fè m' mal pou m' wè sa ki rive moun lavil mwen yo!

Plenn 3:52 (HCB)
Yon bann moun ki pa vle wè m' san m' pa fè yo anyen pran kouri dèyè m' tankou yon zwazo y'ap chache pran.

Plenn 3:53 (HCB)
Yo lage m' tou vivan nan yon twou. Yo fèmen bouch twou a ak wòch.

Plenn 3:54 (HCB)
Dlo te prèt pou kouvri tèt mwen. Mwen di: Fwa sa a m' pran!

Plenn 3:55 (HCB)
Nan twou kote m' te ye a, Seyè, mwen rele ou!

Plenn 3:56 (HCB)
Ou tande vwa m'. Tanpri, pa bouche zòrèy ou lè m'ap lapriyè nan pye ou.

Plenn 3:57 (HCB)
Wi, lè m' rele ou, ou pwoche. Ou di m' mwen pa bezwen pè!

Plenn 3:58 (HCB)
Bondye Sèl Mèt, ou pran ka m' an konsiderasyon. Ou sove lavi m'.

Plenn 3:59 (HCB)
Seyè, ou wè tout lenjistis y'ap fè m'. Tanpri, defann kòz mwen.

Plenn 3:60 (HCB)
Ou wè jan yo soti pou pwofite sou mwen, jan y'ap fè konplo pou touye m'.

Plenn 3:61 (HCB)
Seyè, ou tande jan y'ap joure m'. Ou konnen konplo y'ap fè sou do m'.

Plenn 3:62 (HCB)
Tout lajounen, y'ap pale sou mwen, y'ap fè plan.

Plenn 3:63 (HCB)
Gade yo non! Depi maten jouk aswè yo chita ap fè chante sou do m'!

Plenn 3:64 (HCB)
Seyè, se pou ou pini yo pou tou sa yo fè.

Plenn 3:65 (HCB)
Madichonnen yo! Fè yo pèdi tèt yo!

Plenn 3:66 (HCB)
Move sou yo, Seyè! Pati dèyè yo! Disparèt yo sou latè!

Plenn 3 HCB

Plenn (HCB) Chapter Selection

HCB Book Selection List