Deteronom 14:1 (HCB)
Seyè a, Bondye nou an, konsidere nou tankou pwòp pitit li. Lè nou gen moun mouri, piga nou kòche kò nou ak kouto, ni piga nou kale devan tèt nou.

Deteronom 14:2 (HCB)
Paske se yon pèp k'ap viv apa pou Seyè a, Bondye nou an nou ye. Se nou menm Seyè a te chwazi nan mitan tout pèp sou latè pou nou te tounen yon pèp ki rele l' pa li.

Deteronom 14:3 (HCB)
Piga nou manje anyen Seyè a deklare nou pa gen dwa manje.

Deteronom 14:4 (HCB)
Men bèt nou gen dwa manje: se bèf, se ti mouton, se ti kabrit,

Deteronom 14:5 (HCB)
se sèf, se kabrit mawon, se den, se boukten, se antilòp, se bèf mawon, se mouflon.

Deteronom 14:6 (HCB)
Nou gen dwa manje vyann tout bèt ki gen zago fann an de depi yo remoute manje tou.

Deteronom 14:7 (HCB)
Men, nan bèt ki remoute manje yo, piga nou manje vyann bèt tankou chamo, lapen ak daman ki pa gen zago yo fann an de. Bèt konsa pa bon pou nou manje.

Deteronom 14:8 (HCB)
Konsa tou, piga nou manje vyann kochon, paske atout li gen zago li yo fann an de, li pa remoute manje. Se yon bèt ki pa bon pou nou menm k'ap sèvi Bondye pou nou manje. Piga nou janm manje vyann yo ni piga nou janm manyen kadav yo.

Deteronom 14:9 (HCB)
Nou gen dwa manje tout bèt lanmè depi yo gen zèl najwa pou naje ak kal sou kò yo.

Deteronom 14:10 (HCB)
Men, piga nou manje ni sa ki pa gen zèl najwa, ni sa ki pa gen kal sou kò yo. Bèt konsa pa bon pou nou menm k'ap sèvi Bondye pou nou manje.

Deteronom 14:11 (HCB)
Se pa tout zwazo moun k'ap sèvi Bondye gen dwa manje.

Deteronom 14:12 (HCB)
Men zwazo nou pa gen dwa manje: se lèg, lòfre, malfini lanmè,

Deteronom 14:13 (HCB)
milan, otou, votou ak lòt bèt menm fanmi ak yo ki manje kadav,

Deteronom 14:14 (HCB)
tout kalite kaou,

Deteronom 14:15 (HCB)
otrich, janmichèt, poul dlo, malfini ak lòt bèt menm fanmi ak yo ki manje vyann vivan,

Deteronom 14:16 (HCB)
koukou, frize, gwo kanna mawon blan,

Deteronom 14:17 (HCB)
grangozye, plonjon, chwèt,

Deteronom 14:18 (HCB)
sigòy, krabye ak tout lòt bèt menm fanmi ak yo, sèpantye ak tchotcho.

Deteronom 14:19 (HCB)
Tout ti bèt ak zèl pa bon pou nou menm k'ap sèvi Bondye. Piga nou manje yo.

Deteronom 14:20 (HCB)
Men, nou gen dwa manje zwazo ki bon pou moun k'ap sèvi Bondye.

Deteronom 14:21 (HCB)
Piga nou janm manje ankenn bèt nou jwenn tou mouri, paske nou menm se yon pèp k'ap viv apa pou Seyè a, Bondye nou an, nou ye. Men, nou ka pran vyann lan pou nou bay osinon pou nou vann moun lòt nasyon k'ap viv nan mitan nou ou ankò ki depasaj lakay nou. Piga nou janm kwit yon jenn ti kabrit nan lèt manman l'.

Deteronom 14:22 (HCB)
Chak lanne, n'a pran ladim rekòt nou, yon dizyèm nan tou sa jaden nou yo donnen, n'a mete l' apa.

Deteronom 14:23 (HCB)
Apre sa, nou va ale kote Seyè a te chwazi pou fè sèvis pou li a. Epi la, devan Seyè a, n'a manje ladim farin nou, ladim diven nou ak ladim lwil oliv nou ansanm ak premye pitit bèf, premye pitit mouton ak premye pitit kabrit nou yo. Se konsa n'a aprann pou nou toujou gen krentif pou Seyè a.

Deteronom 14:24 (HCB)
Men, si kote Seyè a chwazi pou fè sèvis pou li a twò lwen lakay nou, kifè vwayaj la ap twòp pou nou, nou pa ka pote ladim rekòt Bondye ban nou pou benediksyon an,

Deteronom 14:25 (HCB)
lè sa a, n'a vann ladim lan, n'a kenbe lajan lavant lan nan men nou epi n'a ale kote Seyè a te chwazi pou fè sèvis pou li a.

Deteronom 14:26 (HCB)
Lè n'a rive, n'a achte ak lajan an sa nou pi pito: bèf, mouton, kabrit, diven, likè, wi tou sa nou pi renmen. Epi la, devan Seyè a, Bondye nou an n'a manje yo, n'a fè fèt ansanm ak tout moun lakay nou.

Deteronom 14:27 (HCB)
Pa bliye moun Levi k'ap viv nan lavil nou yo paske yo menm yo pa gen anyen ki rele yo pa yo.

Deteronom 14:28 (HCB)
Chak twazan, n'a pran ladim tout rekòt n'a fè nan lanne a, n'a mete yo nan pòtay lavil nou yo.

Deteronom 14:29 (HCB)
Moun Lèvi yo ki pa gen anyen ki rele yo pa yo va vini, y'a pran sa yo bezwen. Konsa tou, moun lòt nasyon yo, timoun ki pèdi papa yo, fanm vèv yo va vini, y'a pran sa yo bezwen. Se konsa, Seyè a, Bondye nou an, va beni nou nan tou sa n'ap fè.